Hatutan.com, (10 Janeiru 2023), Díli—Governu Japaun sei oferse oportunidade ba Timoroan sira hodi ba servisu iha Japaun liu-liu iha área indústria agríkola.

Embaixadór Japaun iha Timor-Leste, Kimura Tetsuya hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Tersa (10/01/2023). Foto/Média PR.

Oportunidade ne’e, Timoroan sira la’ós de’it servisu maibé sei iha oportunidade atu hakle’an koñesimentu no aumenta abilidade nune’e bainhira kontratu remata bele mai aplika iha Timor-Leste hodi ajuda dezenvolvimentu país nian.

Lee Mós: Japaun Konstrui Postu Saúde Ida iha Souro

“Ita la’ós de’it atu fó servisu maibé sei transmite mós abilidade no koñesimentu iha Japaun liuliu kona-bá teknolójia atu traballadór sira ne’ebé iha oportunidade ba servisu iha Japaun bele lori mai aplika iha Timor-Leste,” Embaixadór Japaun iha Timor-Leste, Kimura Tetsuya hateten hafoin hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Tersa (10/01/2023).

Embaixadór Japaun, Kimura Tetsuya hateten Prezidente Repúblika kontente simu delegasaun hosi Japaun nian, no iha sorumutu ne’ebé hala’o ho Xefe Estadu ne’e ko’alia kona-bá oinsa atu promove servisu ba traballadór sira iha programa estajiu ne’ebé hanaran Teknical Intern Trainng Program (TITP).

Objetivu hosi programa ne’e rasik atu fó servisu ba Timoroan sira iha Japaun liu husi programa ne’ebé governu Japaun trasa ona.

Japaun ho Timor-Leste iha inísiu ba diskusaun kona-bá memorandum of Coorporation (MoC), no komunikasaun ne’e la’o hela, bainhira komunikasaun la’o hela Timor-Leste hetan daudaun mós vizita hosi Kochi Perfectural Goverment liu hosi departementu Komérsiu, indústria no laborál iha ne’ebé empreza sira ne’ebé hala’o sira nia atividade iha área indústria agríkola mai vizita direita Timor-Leste atu haree kondisaun no preparasaun ne’ebé Timor-Leste iha molok haruka traballadór ba Japaun.

Objetivu hosi vizita ne’ebé Kochi coorporated halo atu iha programa pilotu ida, hodi deskute téknikamente ho Governu liu hosi SEPFOPE, atu iha akordu ida ne’ebé sei sai hanesan baze atu haruka traballadór Timoroan ba rai liur.

“Ami informa ida ne’e ba Prezidente Repúblika José Ramos-Horta no nia kontente tebes, apoiu programa ne’e tanba bele ajuda nasaun rua. Bainhira indústria iha Japaun presiza ema, Timor-Leste mós bele fornese traballadór. Ami haree katak Prezidente Ramos-Horta kontente nune’e ami sei servisu ho governu liu hosi SEPFOPE no entidades sira seluk atu realiza ne’e ho di’ak,” nia dehan.

Diplomata ne’e hateten Kona-bá rekizitu atu ba servisu iha Japaun, Grupu Kochi coorporated hasoru ona ho SEPFOPE no rekuzitu ida importante liu mak tenke hatene lian Japaun.

Kochi sei servisu hamutuk ho Embaixada Japaun no SEPFOPE para bele estabelese kursu lian Japaun atu nune’e Timoroan sira bele aprende nune’e bele ba servisu iha Japaun.

“Ajensia privadu sira iha Japaun mak sei halo rekrutamentu ba traballadór sira no governu sei fasilita deit liu husi MoC ne’ebé sei assina entre governu Japaun no Timor-Leste,” nia informa.

Kochi haree liu ba iha área agrikultura nune’e hahú ho programa pilotu hodi haruka traballadór na’in lima ne’ebé oras-ne’e SEFOPE prepara iha sentru formasaun no ba oin nia númeru ne’e sei aumenta depende ba nesesidade indústria iha Japaun, sira presiza traballadór hira no Timor-Leste bele haruka traballadór.

Jornalista: Vito Salvadór