Hatutan.com, (26 Dezembru 2022), Díli-Polisia Nasionál Timor-Leste (PNTL) Munisípiu Díli, liuhosi Unidade Polísia Tránzitu (Poltranz) rejista asidente hamutuk 10 no halo apreensaun bá motór ho karreta hamutuk 15 iha Dili durante selebrasaun festa Natal 24-25 fulan-Dezembru 2022.

Lee Mós : Durante Natál, PNTL Díli Rejista Ema ida Mate no Asidente Ualu

Karreta sira ne’ebé PNTL prende tanba viola Lei. Foto/Elio dos Santos da Costa

Komanante Unidade Tranzitu Munisípiu Díli, Inspetór Domingos Sarmento Gama, relata katak  karreta ho motór sira ne’ebé prende ne’e durante halo operasaun iha sidade Díli iha ámbitu selebrasaun Natal nian.

“Durante loron 20 to’o mai loron 25 fulan-Dezembru, movimentu iha Díli laran bele konsidera aas tebes no atu evita movimentu sira kontra regra tránzitu nian, maka Polísia hala’o nia knaar hodi konsege prende karreta ho motór hamutuk 15 tanba viola Kódigu Estada,” Inspetór Polísia, Domingos Sarmento Gama, informa bá jornalista sira iha kna’ar fatin Caicoli, Díli segunda (26/12/2022).

Totál evidensia 15 ne’e, kompostu hosi motorizada 12, inklui karreta boot ho roda sanulu hamutuk 3. Kareta pezadu sira ne’e viola regra ne’ebé maka despaixu konjuntu hasai ona, katak, labele halo sirkulasaun iha loron. Maibé, sira hala’o sirkulasaun iha fali loron, ho nune’e maka membru PNTL sira iha terrenu halo kedan apreensaun.

Inspetór Polísia Domingos Gama informa tán, durante loron rua; 24-25 kalan, PNTL Díli liuhosi Unidade Poltranz, rejista asidente hamutuk 10. Iha dia 24 loron ho kalan, hamutuk asidente hitu (7) no  iha kalan 25 rejista asidente tolu (3).

“Totál asidente hamutuk 10. Entre asidente 10 ne’ebé mak akontese iha loron rua, loron boot Natál, la rejista asidente fatál ka ema lakon vida. Iha de’it maka, kanek todan ida, no oras ne’e halo hela tratamentu iha Ospitál Nasionál Guido Valadafres (HNGV) no  na’in-sia (9) seluk kanek kaman,” Domingos Gama, informa.

Karreta ne’ebé PNTL prende tanba viola Lei. Foto/Elio dos Santos da
Costa

Komandante Poltranz Dili ne’e dehan, uainhira halo komparasaun dadus asidente tráfegu iha loron boot Natál 2021, rezulta ema barak mak lakon sira nia vida ho motór no karreta. Maibé, iha tinan ne’e, la akontese asidente fatál ka mate.

Iha okaziaun ne’e, Inspetór Polisia Domingos Sarmento Gama husu kondutór nomós ho na’in kompañia sira kontentór nian, atu kumpri no halo tuir bá despaixu konjuntu ne’ebé mak estabelese hosi PNTL liuhosi Departamentu Tránzitu ni Seguransa Rodoviáriu, Comissão da Função Pública (CFP), Comissão Anti Corrupção (CAC), Diresaun Nasional bá Transportes Terrestres (DNTT).

Jornalista: Rogério Pereira Cárceres