Hatutan.com, (21 Dezembru 2022), Díli—Polísia Nasionál Timor-Leste (PNTL), liuhosi Departamentu Tránzitu no Seguransa Rodoviáriu, rejísta sidadaun na’in-105 mak lakon vida, tanba hetan asidente ho motór no karreta.

Membru Polisia Nasionál Timor Leste (PNTL, Munisipiu Dili asegura hela sidadaun ne’ebé kanek tanba asidente tráfegu iha área Comoro, Fevereiru 2022. Foto/Hatutan.com.

Xefe Departamentu Tránzitu Nasionál no Seguransa Rodoviáriu, Assistente Superintendente, Albino Mauzinho informa rekapitulasaun dadus asidente viasaun hosi munisipiu 13, RAEOA ho territoriu nasionál, rejísta totál kazu asidente tráfegu hamutuk 1.815.

Lee Mós: Ema Na’in-neen Mate Ho Asidente Durante Finadu

Hosi ne’e, kompostu hosi kanek kaman 246 no kanek todan 410. Kazu sira ne’e, akontese barak liu iha kapitál Munisipiu, Díli, Baucau no Likisá.

“Kazu sira ne’e, ema ne’ebé mak envolvidu, lakon nia vida iha 105,” Assistente Superintendente, Albino Mauzinho informa liuhosi konferénsia imprénsa iha Kuartél Jerál PNTL, Caicoli, Kuarta (21/12/2022).

Hosi kazu sira ne’e, tuir análiza ne’ebé mak departamentu tránzitu foti iha kazu sira ne’e hotu, iha kazu 130 mak prosesu finaliza ona, kazu 83 prosesa ona bá iha Tribunál, kazu 767 mak sei iha prosesu nia laran, no kazu hamutuk 835 mak rezolve tuir família.

Departamentu Tránzitu Nasionál no Seguransa Rodoviáriu konklui katak, kazu hirak ne’e mosu kontribui hosi fatór sira mak hanesan, fatór umanu ho 75%, fatór bá kondisaun veíkulu ne’e rasik ho 10%, fatór dalan ka kondisaun dalan ne’ebé utiliza 10%, ho 5% kauza hosi fatór natureza nian.

PNTL liuhosi Departamentu Tránzitu Nasionál no Seguransa Rodoviáriu, husu públiku liu-liu utente sira bá iha instalasaun apoiu hanesan estrada ka kondisaun transporte ne’ebé mak utentes sira uza bá iha loron boot Natál ho tinan foun 2022 ho 2023 mai, primeiru tenke iha dokumentu komprovativu sira mak hakerek iha Lei Kódigu Estrada nian, númeru 06/2003.

Dokumentu sira ne’ebé presiza lori maka, dokumentu transporte nian rasik ho dokumentu ema nia rasik, hanesan karta kondusaun.

Iha dokumentu rua ne’e, PNTL hakarak informa bá públiku katak, karik pesoál ida ne’ebé mak utiliza estrada, karreta ka transporte sira, la kondús ho regras empeñamentu ne’ebé estabelese iha kódigu estrada, ida ne’e krime.

“Tanba ne’e, husu bá ita nia sidadaun hothotu, atu kondús karreta ka motór, tenke iha karta kondusaun. Dokumentus seluk ne’ebé mak ita temi hanesan ohin, tenke rai iha ita nia aan rasik, bainhira ita kondús karreta ka motór,”Albino Mauzinho, fó hanoin.

Komandu PNTL liuhosi Departamentu Tránzitu Nasionál no Seguransa Rodoviáriu, kontinua husu bá motorista sira, ka sidadaun sira labele utiliza transporte Estadu serbisu ka Estadu nian iha loron boot Santu Natál 2022 ho Tinan Foun 2023.

Ho selebasaun loron boot rua ne’ebé besik, PNTL husu mós bá kondutór sira atu labele tula pasajeiru liu kapasidade karreta nian, nune’e evita kazu asidente tráfegu.

Jornalista: Rogério Pereira Cárceres