Hatutan.com, (30 Novembru 2022), Díli—Prezidente Repúblika (PR), José Ramos-Horta simu ona proposta Orsamentu Jerál Estadu (OJE) 2023 ne’ebé Parlamentu Nasionál (PN) aprova no garante sei halo aprovasaun iha tempu badak, hodi fó biban ba governu atu halo preparativus ba ezekusaun.

PR Ramos Horta ko’alia ba jornalista sira hafoin hasoru malu ho PM Taur iha Farol, Díli, Segunda (19/09/2022). Foto/Elio dos Santos da Costa

Oras ne’e Xefe Estadu hahú haree no lê hela proposta OJE 2023 ne’ebé  governu submete hafoin hetan aprovasaun iha Parlamentu Nasionál.

Lee Mós: OJE 2023 Billaun $3,16 Aprovadu iha Finál Globál

“Ha’u hanoin iha semana ne’e nia laran ha’u tenke entrega no haruka ba promulgasaun atu governu iha tempu prepara buat hotu-hotu no hahú iha loron 01 fulan-Janeiru 2023 orsamentu funsiona ona,” Prezidente Repúblika José Ramos-Horta hateten iha Salaun OKA Rudal, Osindu, Kuarta (30/11/2022).

Xefe Estadu sei lahare ba iha parte konstituisionál de’it, tanba tuir nia, parte konstituisionál laiha problema no sei foka liu atu haree mós ba alokasaun orsamentu ba seitór sira ne’ebé iha.

Proposta Orsamentu Jerál Estadu (OJE) bá tinan 2023 aprovadu iha votasaun finál globál iha Parlamentu Nasionál (PN) ho montante billiaun $3,16 ho votus afavór 42, kontra 21 no abstensaun 2 iha  Kinta (17/11/2022).

Deskrisaun detallada kona-bá Propósta OJE 2023 hateten, totál despezas globál billiaun $3,16 ne’e kompostu hosi Orsamentu Administrasaun Sentrál billiaun $2,8 (montante ne’e inklui ona Fundu Kombatentes Libertasaun Nasionál, billiaun $1). Orsamentu Seguransa Sosiál hetan alokasaun millaun $235,7 no RAEOA millaun $120.

Jornalista: Vito Salvadór