Hatutan.com, (28 Novembru 2022), Díli- Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU), Gerda Verburg, husu atu Estadu no Governu Timor -Leste foku bá hadi’a problema mánutrisaun no liuliu tau matan bá inan isin-rua no labarik sira hosi idade zero to’o tinan-rua.

Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU) Gerda Verburg to’o iha Timor-Leste, Segunda (28/11/2022). Foto/Vito Salvadór

Hafoin to’o iha Dili, Timor-Leste, Segunda (28/11/2022), Gerda Verburg ba jornalista hateten  hanesan Koordenadora Jerál Movimentu Bá Hadi’a Nutrisaun ONU nia, kontente bele mai vizita Timor-Leste tamba iha tinan rua liubá Timor-Leste adere ona ba movimentu hadi’a nutrisaun, liuhosi karta ne’ebé mai hosi Primeiru-Ministru Taur Matan Ruak, atu Timor-Leste sai hanesan membru bá dala-62 husi membru atual hamutuk 65.

Timor-Leste hanoin katak problema mánutrisaun ne’e importante, tamba ne’e Timor-Leste liuhosi karta ne’ebé Primeiru-Ministru submete bá movimentu ne’e atu oinsá hetan apoiu di’ak liután, hodi hadi’a problema mánutrisaun iha Timor-Leste.

“Estratéjia ka konsellu ne’ebé movimentu hadi’a nutrisaun fó ba Estadu maka se bele Governu foka bá hadi’a di’ak liután nutrisaun, liuliu tau matan bá inan isin-rua sira to’o labarik tinan-rua,” Gerda Verburg hateten.

Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU) nia vizita mai Timor-Leste atu haree besik esforsu estadu no governu nian ba hadi’a nutrisaun iha Timor Leste.

Durante vizita koordenadór movimentu hadi’a nutrisaun ne’e sei halo sorumutuk ho entidade estadu no governu nian, hahú husi Prezidente Repúblika, Primeiru-Ministru, Bankada Parlamentár inklui sosiedade sivíl, seitor privadu, universitáriu no mós konsellu juventude.

“Ami espera katak nia vizita ne’e bele inspira di’ak liután atu rezolve di’ak mánutrisaun iha ita-nia rain. Ita hatene katak oras ne’e daudaun iha ita-nia rai sofre mánutrisaun no inseguransa ai-han dala ida de’it,” pontu fokál movimentu bá hadi’a nutrisaun Timor-Leste,  Filipe da Costa hateten

Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU) Gerda Verburg to’o iha aeroportu internasionál Nicolau Lobato, Comoro, Dili ho aviaun komersiál Citilink iha oras tuku 12:15 Otl no simu direita husi koordenadór movimentu hadi’a nutrisaun Timor-Leste, Reprezentante husi Ministériu Negósiu Estranjeiru, Gabinete Koordenadór Rezidente ONU iha Timor-Leste, Reprezentante husi Programa ai-han Mundiál (WFP) United Nation Children Fund (UNICEF), no Organizasaun Saúde Mundiál (OMS).

Koordenadór Globál Movimentu
Hadi’a Nutrisaun no Sekretáriu Adjuntu Organizasaun Nasoins Unidas (ONU) Gerda Verburg lidera delegasaun membru tolu ne’ebé inklui, Srikanth Eadara, rejionál Reprezentante Sekretariadu movimentu ba hadi’a nutrisaun Asia, ho Alexandre Brecher, Komunikasaun no asesór advokasia ba movimentu hadi’a nutrisaun.

Movimentu nutrisaun, nu’udar inisiativa globál ho membru 65 nasaun no parseiru sira ne’ebé buka atu inspira no orienta asaun hodi realiza vizaun husi menus nutrisaun iha forma hotu-hotu to’o tinan 2030, ba ema hotu, espesialmente feto no oan sira.

Vizita ne’e hahú iha loron 28 fulan-Novembru to’o loron 02 fulan-Dezembru 2022.

Jornalista: Vito Salvadór