Hatutan.com, (22 Novembru 2022), Díli— Instituto de Gestão Equipamentos (IGE) koloka ona ekipamentu pezadu atu normaliza hikas mota rua ne’ebé antes ne’e sobu irrigasaun iha Manatuto-Vila, Rembor no Laclo iha loron 4 Abril 2021.

Kondisaun Mota Laclo hateke hosi foho leten. Foto/Rogerio Pereora Carceres.

Udan boot iha altura ne’ebá afeita tebes bá irrigasaun ne’ebé hetan estragus totál hodi afeita ba populasaun kuaze tinan rua ona labele halo natar.

Lee Mós: Presiza Konstrui Lalais Moru Protesaun iha Mota Manatuto

Nune’e, iha loron 07 Jullu 2022, Assesór Polítika Prezidente Repúblika, Tomás do Rosário Cabral lori karta rekomendasaun hosi Prezidente Repúblika, José Ramos-Horta liu hosi Xefe Casa Civil hodi hala’o reniaun ho autoridade no agrikultór Manatuto presiza hetan intervensaun lalais.

Prezidente Republika, José Ramos-Horta antes ne’e hala’o ona diálogu ho populasaun hodi husu rezolve problema irrigasaun, nune’e iha loron 15 juñu 2022, Xefe Estadu hala’o mós  enkontru ho Prezidente Institutu Jestaun Ekipamentu, Institutu Públiku (IGE), Ermenegilda da Costa Laurentina hodi informa preokupasaun povu hodi IGE bele hadi’a mós kondisaun estrada ligasaun Cribas ba aldeia Camedar, Suku Barique, Postu Administrativu Natarbora- Manatuto.

Assesór Polítiku Prezidente Repúblika, Tomás do Rosario Cabral iha vizita ba Mota Rembor koordena kedan ho ekipa IGE bele tulun hodi koloka ekipamentu pezadu hadi’a hikas kondisaun irrigasaun hodi fasilita bee tama populasaun sira nia natar.

“Impaktu hosi udan boot iha loron 04 Abril 2021, irrigasaun kuaze aat hotu, no tinan rua kuaze populasaun la halai natar. Tanba ne’e Prezidente Repúblika husu tulun ba IGE ho koordenasaun autoridade no povu Manatuto bele tulun hadi’a hikas kondisaun mota hodi bee bele tama fali ba populasaun nia natar,” Hatutan.com sita deklarasaun Tomás Cabral iha komunikadu, Segunda (21/11/2022).

Daudaun ne’e ekipa IGE koloka ona ekipamentu pezadu boot rua ba Mota Rembor no tuir planu, Tersa (22/11/22) ba oin ekipa hahú servisu hadi’a bee dalan ne’ebé hetan estragus grave bele normaliza hikas.

Parte seluk, Administradór Munisípiu Manatuto, Bernardo Lopes agradese ba apoiu hosi Prezidente Repúblika, José Ramos Horta hodi koordena ho IGE bele tulun oinsá koopera servisu di’ak liu tán bá iha nesesidade povu nian iha tempu emerjénsia.

Jornalista: Rogério Pereira Cárceres