Hatutan.com, (07 Novembru 2022), Díli-  Sekretáriu Estadu Juventude no Desportu (SEJD), Abrão Saldanha, hateten nia parte hetan ona esplikasaun hosi Federasaun Futebol Timor Leste (FFTL) kona-bá  remunerasaun jogadór selesaun nasionál ne’ebé to’o oras ne’e FFTL seidauk selu.

Lee Mós : SEJD Sei Organiza no Garante Disiplina GAM-GAR

SEJD Abrão Saldanha. Foto/GPR

“Kestaun kona-bá jogadór sira la hetan remunerasaun, ha’u hetan ona esplikasaun hosi FFTL katak iha fundu transferénsia balun tarde bá sira mak agora sira buka dalan hamutuk ho AFC atu rezolve ida ne’e,” SEJD, Abrão Saldanha haktuir  bá jornalista sira, Segunda (07/11/2022).

FFTL mós seidauk halo pagamentu bá treinador selesaun nasionál Fábio Joaquim Maciel da Silva, nune’e treinador ho nasionalidade Brazileiru ne’e mós deside hakotu nia kontratu ho FFTL.

Alem de jogador selesaun nasionál no Treinadór, FFTL mós sei deve árbitru nasionál ne’ebé durante ne’e fó kontribuisaun hodi lidera jogu iha liga époka 2021 no mós jogu amizade sira ne’ebé FFTL mak organiza.

Ho situasaun sira ne’e halo prestasaun Timor-Leste nian iha jogu apuramentu ba tasa ASEAN Football Federation (AFF) Mitsubishi Electric Cup 2022 hetan rezultadu negativu tamba hetan derrota 6-2 hosi Brunei Darussalam.

Razaun prinsipál bá derrota ne’e tamba jogador selesaun nasionál barak deside hodi lakohi partisipa iha ekipa selesaun nasionál tamba sira nia direitu ba remunerasaun hosi FFTL too oras ne’e laiha serteza.

FFTL Hahú Halo Pagamentu

Sita hosi pájina ofisial Facebook FFTL nian katak FFTL hahú halo pagamentu salariu  treinador no jogadór sira Selesaun Nasionál.

Iha Segunda, 07 Novembru 2022, Federasaun Futebol Timor-Leste halo ona pagamentu bá salariu jogadór sira no treinadór sira hahú hosi senior feto no mane, Sub 19 bá kompetisaun AFF, Sub 20 ba kompetisaun AFC no Sub 16 ba kompetisaun AFF.

Pagamentu ne’e hahú hala’o no sei kompleta iha  kuarta, 09 fulan-Novembru 2022.

FFTL liuhosi Diresaun Finansas hahu halo pagamentu ba Selesaun Senior ba kompetisaun AFF Suzuki Cup 2020, Sea Games 2021 nomos jogu amigaveis kontra Nepal, Camboja no Filipina.

Bá pagamentu hirak seluk, sei kompleta iha loron rua tuir mai. Pagamentu ne’e inklui mós salariu ba Ex-Treinador prinsipál Fabio Maciel no Treinador Fiziku Silas Paixao.

Atu informa ba publiku hadomi na’in futebol katak fontes husi fundos ne’e rasik mai husi doador es principal FFTL nian FIFA no AFC. Liu husi prosesu lubun ida, fundos ne’e hetan aprovasaun husi FIFA no AFC iha fim de fulan-Outubru 2022.

SEJD hein proposta husi órgaun liga ho FFTL ba époka 2022-2023

Kona-bá Liga Futebol Timor Leste, iha ona konkordánsia entre órgaun liga ho federasaun, SEJD simu ona informasaun hosi federasaun katak sira sei hatama proposta mai atu foti osan.

Nia afirma Governu disponivel iha osan, hein de’it organizadór sira hanesan federasaun ho órgaun liga entende malu Governu bele fó apoiu atu hala’o liga, tanba la’ós governu mak organiza liga, federasaun mak organiza.

“Liga futebol tinan 2022 ne’e Orsamentu ne’ebé Parlamentu Nasionál aprova $200,000, halo ezersísiu tan halo atu balansu tinan kotuk nian ho $40,000 hanesan ne’e entaun hamutuk $240,000 Governu mobiliza atu apoiu, depende de’it ba órgaun liga ho federasaun bainhira konsege ona iha kalendáriu ida prosesu tékniku ne’e preparadu bele hala’o, no sira dehan tinan ida ne’e bele halo,” Nia dehan.

Jornalista: Vito Salvadór