Hatutan.com, (17 Outubru 2022), Díli—Prezidente Repúblika (PR), José Ramos-Horta husu ba Servisu  Rejistu no Verifikasaun Emprezariál, Institutu Públiku (SERVE, I.P) no Ajénsia Promosaun Investimentu no Exportasaun, Institutu Públiku (Trade Invest,I.P) atu servisu ho profisionál no tenke halo atendimentu di’ak liu atu bele dada investór sira hosi liur mai investe iha Timor Leste (TL).

Diretor Ezekutivu Trade Invest, I.P, Arcanjo da Silva ho Diretór SERVE, I.P, Florêncio Sanches hala’o audiénsia ho Prezidente Repúblika, José Ramos-Horta iha Palásiu Prezidensiál Bairru-Pité, Segunda (17/10/2022). Foto/Média PR.

“Prezidente Repúblika bolu SERVE,I.P ho Trade Invest,I.P mai marka aúdiénsia atu informa servisu loro-loron ne’ebé instituisaun rua ne’e halo, liu-liu dezafiu ne’ebé hasoru no mós rezultadu ne’ebé atinji durante ne’e. Xefe Estadu hakarak atu serbisu ho profisionál liu tán,” Diretor Ezekutivu Trade Invest, I.P, Arcanjo da Silva hateten iha Palásiu Prezidensiál Bairru-Pité, Segunda (17/10/2022).

Lee Mós: SERVE Seidauk Atribui Lisensa Bá Ajénsia Hodi Halo Rekrutamentu Traballadór Timoroan

Xefe Estadu hakarak hatene liu SERVE ho Trade Invest nia servisu ba fasilitasaun dezenvolvimentu ekonomia nasaun nian, liu hosi seitór privadu liu-liu aposta ba emprezáriu nasionál no internasionál ne’ebé bolu dehan investidór doméstika no investidór estranjeiru sira.

“Xefe Estadu haruka ita presta Trade Invest ho SERVE ba atendimentu tenke di’ak liu, atu bele atrai investidór sira mai Timor. Tanba, atrasaun investimentu ne’e kompetisaun ida atu investedór sira iha reziaun ne’ebá investe iha Timor, no investidór sira iha mundu bele mai investe iha Timor. Iha kompetisaun ne’e Xefe Estadu mós tau atensaun maka’as ba reforma administrasaun ita nia instrumentu legais sira,” Arcanjo da Silva hateten.

Alende ne’e, tenke iha kapasidade tékniku no étika di’ak atende investedór no emprezáriu sira. Investidór ne’ebé Estadu, governu sertifika, desde tinan 2005 estabelesimentu Trade Invest iha Timor Leste to’o ohin loron, foin mak sertifika no asina akordu espesiál investementu kategoria tolu purvolta 298 investidór ne’e sura hamutuk ona investidór nasionál no investidór internasionál.

Pelikan Paradise hanesan investimentu ida ne’ebé boot tebe-tebes, tanba ne’e luta atu atrai investidór sira atu mai investe lá’ós fásil, presiza atendimentu ida ne’ebé di’ak alende apoiu lejislasaun sira.

Pelikan Paradise hahú mai iha Timor Leste iha 2018, atravesa ona governu lubuk ida maibé tanba sá mak kleur, tanba atu diskute akordu espesiál investementu ida kona-bá rai ne’ebé iha Timor ne’e ida de’it iha Tasi Tolu.

Alende rai Tasi Tolu, nia mós sítiu istóriku ne’ebé presiza proteze, bainhira TL fó ba investidór atu investe, muda ka la muda ne’e presiza diskusaun naruk no kle’an ba interese Estadu, interese povu Timor Leste, maibé labele haluha mós interese investidór ne’ebé atu investe purvolta millaun $700.

Klaru katak Konsellu Ministru aprova pur-rezoluasaun fó biban ba MKAE atu asina akrodu, fó biban mós ba Ministériu Justisa na altura Vise Ministru Justisa atu asina akordu arrendamentu ne’ebé aneksa ba akordu espesiál investimentu.

“Ita fó sertifikadu investidór la garante asesu ba rai, entaun ne’e susar. Akordu arrendamentu rai presiza haree didi’ak ba interese Estadu ba longu tempu. Maibé, keta haluha mós interese investidór ninian, tanba ne’e mak negosiasaun solusióna ona,” nia dehan.

Nune’e mós Diretór SERVE, I.P, Florêncio Sanches hateten Prezidente Repúblika bolu atu esplika mós oinsá institutu rua ne’e bele apoiu dezenvolvimentu ekonomia país ida ne’e nian.

Pontu balun ne’ebé Xefe Estadu hateten presiza armonizasaun lejislasaun sira iha Timor Leste, armonizasaun lei ida ne’e importante tebe-tebes atu bele dezenvolve país ida ne’e ninia ekonomia.

Hakrak halo dijitalizasaun importante ohin loron servisu teritóriu halo iha surat tahan ne’ebé país balun la halo ona ida ne’e importante.

“Se buat sira ne’e la’o hotu ho dijitalizasaun bele kria lei foun, ita bele halo revizaun, halo armonizasaun, ita bele kria kampu traballu, nune’e bele kada ita nia sidadaun país ida ne’e bele hetan benéfisiu ba ida ne’e nian,” Florencio Sanches hateten.

Kestaun ida mós ba iha sistema bankária Timor ninian katak Xefe Estadu hatete ekonomia país ida ne’e labele la’o bainhira funan Banku Sentrál fó ne’e aas liu.

Ekonomia ne’e labele la’o bainhira kustu ba elestridade ne’e boot tebe-tebes, idea sira bee tau hamutuk nune’e oinsá Trade Invest Institutu Públiku, SERVE Institutu Públiku bele apoiu ba iha dezenvolvementu ekonomia.

Xefe Estadu mós husu katak sei haruka asesór sira hosi Prezidente Repúblika nian atu apoia ba institutu rua ne’e, nune’e bele lei sira ne’ebé temi bele aselera lalais implementa apoiu ida ne’e.

To’o fulan Agostu 2022, SERVE rejistu ona lisensa atividade ekonómika rai laran hamutuk 39.000 no kompañia estranjeiru reprezenta 0.%.

Jornalista: Vito Salvadór