Hatutan.com, (06 Outubru 2022), Díli- Primeiru-Ministru (PM), Taur Matan Ruak,  otimista no fiar, katak  ró Haksolok ne’ebé timor investe ona millaun $14 liu sei mai Timor-Leste.

Lee Mós : Timor-Leste Apoia Millaun $14 bá Reabilitasaun Estaleiru iha Figuera da Foz

Ró Haksolok. Foto/dok.ZEESM TL

Taur otimista liu tan Ró Haksolok sei mai fó Ksolok bá timoroan sira tanba Governu liuhosi autoridade Rejiaun Administrativa Espesiál Oé-Cusse Ambeno (RAEOA) deside sosa asasaun  iha estaleiru Figuera da Foz ho 90% no TL sai hanesan na’in hodi hahú fali konstrusaun bá Ró Haksolok.

Taur Matan Ruak hateten, empreza Atlantic Eagle ne’ebé bankarrota ona, daudaun ne’e, Timor-Leste liuhosi RAEOA sosa ona nia asaun 90% liu, nune’e empreza ne’e Timor nian ona.

 “Saida mak Timor-Leste halo husu atu empreza halo hotu tiha Ró Haksolok ne’e depois nia halo fali atividade seluk portantu ida-ne’e investimentu RAEOA nian. Ha’u fiar katak Ró Haksolok sei mai, tanba ne’e la mai karik ita la konsege sosa kompañia ne’e, sei ita iha saham barak liu iha empreza ne’e sinál katak Ró Haksolok sei mai no prezidente RAEOA inklui eis Prezidente RAEOA Marí Alkatiri rasik ko’alia iha televizaun katak sei mai no ha’u fiar katak sei mai duni,” Taur Matan Ruak hateten bá jornalista sira iha Palásiu Prezidensiál, Kinta (06/10/2022).

Xefe Governu hatutan importante labele deziste no persege nafatin tanba Timor-Leste liuhosi RAEOA halo tiha ona investimentu ida, balun bele manán no balun bele lakon no ida ne’e kona-bá Estaleiru Figuera da Foz nian halo Timor sei iha posibilidade, iha kbiit atu rekupera Timor nia investimentu sira.

Jornalista: Vito Salvadór