Hatutan.com, (21 Setembru 2022), Díli—Konsellu Ministru (KM) iha Kuarta (21/09/2022), aprova ona projetu Rezolusaun Governu nian, ne’ebé aprezenta hosi Vise-Ministru Edukasaun, Juventude no Desportu, António Guterres no Sekretáriu Estadu Juventude no Desportu (SEJD), Abrão Saldanha, kona-bá promosaun prátika atividade fízika iha estabelesimentu públiku.

Vise-Ministru Edukasaun, Juventude no Desportu, António Guterres. Foto/Gabinete Vise-MEJD.

Hosi perspetiva promosaun atividade fízika no hasa’e populasaun sira nia konsiénsia kona-bá importánsia hosi atividade fízika ba saúde no implementasaun polítika intersetoriál no multidixiplinár sira ne’ebé ho objetivu atu hamenus sedentarizmu, Governu estabelese promosaun atividade fízika nian iha órgaun no servisu sira administrasaun públika nian, hodi dedika períodu tempu durante semana ida atu prátika atividade fízika iha ninia tipu no modalidade oioin.

Lee Mós: Horta Husu CDTL Servisu Makas Promove Desportu Timor-Leste Bá Mundu

“Órgaun no servisu administrasaun públika sira-hotu, ne’ebé dependente iha Governu, tenke promove atividade fízika hosi parte funsionáriu sira ne’ebé integra iha órgaun no servisu hirak ne’e, hodi estabelese  períodu tempu ne’ebé loloos, la liu oras ida, iha loron Sesta, entre oras tuku 16:30 no tuku 17:30. Períodu tempu ne’e sei bele hamenus ka  sei la hala’o bainhira iha justifikasaun ho razaun interese públiku, liuliu atu asegura funsionamentu regulár órgaun no servisu administrasaun públika nian,” Hatutan.com sita komunikadu.

Governu apela mós ba organizasaun no sosiedade sivíl no ba empreza sira setór privadu nian atu hamutuk no promove prátika atividade fízika ho ninia kolaboradór no traballadór sira durante pelumenus oras iha semana ida.

Atividade fízika ne’e sei la hala’o iha semana ikus fulan nian, atu garante organizasaun no ezekusaun asaun koletiva ba limpeza jerál hosi aglomeradu populasaun ne’ebé eziste iha territóriu nasionál ne’ebé antes ne’e prevee ona.

Jornalista: Rogério Pereira Cárceres