Hatutan.com, (19 Setembru  2022), Díli- Governu Xina apoiu fundu $70,000 bá Asosiasaun Kafé Timor-Leste (ACTL) hodi hasa’e produsaun no kualidade kafé atu bele responde merkadu mundiál no merkadu doméstika.

Governu Xina apoiu fundu $70,000 bá Asosiasaun Kafé Timor-Leste (ACTL) hodi hasa’e produsaun no kualidade kafé. Foto/Media GPR

Ho apoiu ne’e, Segunda (19/09/2022), iha Suai Room, Timor Plaza, Embaixadór Xina mai Timor-Leste, Xiao Jianguo, asina akordu kooperasaun ho Prezidente ACTL, Evangleino Monteiro Soares, ne’ebé asiste direitamente hosi Prezidente Repúblika, José Ramos-Horta, Ministériu Agrikultura no Peska (MAP), Pedro dos Reis ho membru Governu balun tan.

 Prezidente ACTL, Evagelino Monteiro Soares hateten, orsamentu ne’e depende ACTL jere atu bele fó treinamentu no formasaun di’ak bá membru ACTL ne’ebé sai benefisiáriu, oinsá hasa’e kualidade kafé no hadi’a iha plantasaun prepara kualidade.

Prezidente ACTL ne’e hatutan atividade nune’e Governu liu husi Ministériu Agrikultura no Peska (MAP), ACTL, Embaixadór Xina marka tan istória foun bá rejuvenescimentu kafé iha Timor-Leste.

Iha orsamentu rektifikativu ne’ebé iha Ministériu Agrikultura no Peska (MAP), sei halo reabilitasaun bá kafé iha territóriu nasionál purvolta ektare 8,000 iha Timor tomak.

Prezidente Repúblika (PR), José Ramos-Horta hateten, populasaun Timorense, no sosiedade Timorense tenke haree kafé hanesan haree jardin ida, tenke haree kafé hanesan povu Japonés haree sira-nia jardin.

Hanesan haree sira nia foos, hare no trata hanesan jardin ne’e halo parte kultura bá istória Timor nian.

“Governu tenke tau matan maka’as bá kafé, atu labele ema balun mak hetan osan boot, no produtór sira ne’ebé ki’ik ne’e ki’ak nafatin, tinan bá tinan ki’ak nafatin,” José Ramos-Horta hateten.

Jornalista: Vito Salvadór