Hatutan.com, (17 Setembru 2022), Díli—Prezidente partidu FRETILIN Francisco Guterres “Lú Olo”, Sábadu ne’e (17/09/2022) alta ona hosi Hospital Nasional Guido Valadares (HNGV) hafoin hala’o tratamentu médiku durante loron lima.

Lee Mós : Lú Olo Baixa iha HNGV Tanba Kondisaun Saúde Fraku Uitoan

Prezidente partidu FRETILIN, Francisco Guterres “Lú Olo”. Foto/Elio dos Santos da Costa

Prezidente Repúblika períodu 2017-2022  ne’e baixa iha HNGV hahú hosi kalan 12 fulan-Setembru to’o fali  loron 17 fulan-Setembru ne’e,  no hetan tratamentu médiku ida di’ak tebes hosi komponenti hotu ne’ebé hola papel importante iha área oioin hodi kontribui bá rekoperasaun Lú Olo ne’ebe ho lais tebes.

Komunikadu imprensa  ne’ebé Hatutan.com sita hosi pájina Facebook Lú Olo Presidente da RDTL 2017-2022,  relata katak  Lú Olo ho nia família agradese tebes bá esforsu sira, atendementu di’ak no apoiu tomak la sura kole hosi ekipa médiku espesialista, infermeiras, ekipa laboratorista, ekipa Radiologia, ekipa emergensia ne’ebé fó ona asisténsia médiku ida kualidade nune’e kontribui Lú Olo bele alta lalais.

Bá alta entidade sira hanesan Prezidente Repúblika, Jose Ramos-Horta, Primeiru-Ministru Taur Matan Ruak, Prezidente Parlamentu Nasional Aniceto Guterres, Xefe Estadu Maior F-FDTL Tenenti Jeneral Falur Rate Laek, família bo’ot hosi Partidu FRETILIN, liuliu bá Sekretáriu Jerál FRETILIN, Mari Alkatiri ne’ebe halo vizita kuaze lorloron, veteranus, família hosi Ossu-Viqueque no Atauro no maluk sira seluk ne’ebé la temi naran Ida-ida.

“Ba imi tomak nia laran luak hola momentu balu halo vizita, no orasaun sira mak fó mós forsa no korajen bá Kamarada Lú Olo hodi rekopera lalais hosi nia moras. Bá solidareidade hirak ne’e  eis-Prezidente Lú Olo dala ida tan hamutuk ho nia família hato’o agradese wain tebes,” sita hosi konteúdu komunikadu imprensa ne’e.

Jornalista : Rogério Cárceres