Hatutan.com, (06 Setembru 2022), Díli—Primeiru-Ministru (PM) Taur Matan Ruak, sente triste, lamenta no arrepende haree violénsia hosi grupu joven balun iha Kapitál Dili ne’ebé perturba ordem públiku inklui sidadaun sira nia hakmatek. Ba ida ne’e, Xefe Governu husu deskulpa ba públiku kona-bá perturbasaun ne’e.

Primeiru Ministru, Taur Matan Ruak.

“𝐇𝐚’𝐮 𝐬𝐞𝐧𝐭𝐞 𝐭𝐫𝐢𝐬𝐭𝐞, 𝐥𝐚𝐦𝐞𝐧𝐭𝐚 𝐧𝐨 𝐚𝐫𝐫𝐞𝐩𝐞𝐧𝐝𝐞 𝐡𝐚𝐫𝐞𝐞 𝐯𝐢𝐨𝐥é𝐧𝐬𝐢𝐚 𝐟𝐨𝐢𝐧 𝐥𝐢𝐮𝐛á 𝐢𝐡𝐚 𝐊𝐚𝐩𝐢𝐭á𝐥 𝐃𝐢𝐥𝐢. 𝐍𝐮’𝐮𝐝á𝐫 𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐡𝐚’𝐮 𝐡𝐮𝐬𝐮 𝐝𝐞𝐬𝐤𝐮𝐥𝐩𝐚 𝐭𝐚𝐧𝐛𝐚 𝐩𝐞𝐫𝐭𝐮𝐫𝐛𝐚 𝐢𝐧𝐚𝐧-𝐚𝐦𝐚𝐧, 𝐤𝐨𝐦𝐮𝐧𝐢𝐝𝐚𝐝𝐞 𝐧𝐨 𝐬𝐢𝐝𝐚𝐝𝐚𝐮𝐧 𝐬𝐢𝐫𝐚 𝐧𝐢𝐚 𝐡𝐚𝐤𝐦𝐚𝐭𝐞𝐤. 𝐌𝐚𝐢 𝐢𝐭𝐚 𝐝𝐞𝐤𝐥𝐚𝐫𝐚 𝐯𝐢𝐨𝐥é𝐧𝐬𝐢𝐚 𝐡𝐚𝐧𝐞𝐬𝐚𝐧 𝐢𝐧𝐢𝐦𝐢𝐠𝐮 𝐢𝐭𝐚-𝐧𝐢𝐚𝐧, 𝐧𝐨 𝐩𝐫𝐨𝐦𝐞𝐭𝐞 𝐤𝐨𝐦𝐛𝐚𝐭𝐞 𝐡𝐚𝐬𝐨𝐫𝐮 𝐯𝐢𝐨𝐥é𝐧𝐬𝐢𝐚 𝐭𝐨’𝐨 𝐡𝐚𝐥𝐚𝐤𝐨𝐧 𝐢𝐡𝐚 𝐢𝐭𝐚 𝐫𝐚𝐢𝐧 𝐝𝐨𝐛𝐞𝐧 𝐓𝐢𝐦𝐨𝐫-𝐋𝐞𝐬𝐭𝐞,” Hatutan sita deklarasaun Primeiru-Ministru Taur Matan Ruak iha komunikadu.

Lee Mós: PNTL Detein Autór Na’in-haat Deskonfia Baku Membru F-FDTL Iha Akadiruhun

Xefe Governu hanesan mós Ministru Interiór alerta ona ba Komandu Polísia Nasionál Timor-Leste atu vijilánsia máximu hodi mantein órdem públiku liuliu iha Kapitál Díli, no apela mós ba joven sira atu hakmatek hodi kontribui ba estabilidade nasionál, husik problema krime ne’ebé akontese ona, entrega ba justisa.

Iha parte seluk Vise-Ministru Interiór no Ministru Defeza hasai despaixu konjunta ne’ebé publika ona iha Jornal da Republica, N.º 01/MI-MD/IX/2022, hodi halo operasaun konjunta entre FALINTIL Forsa Defeza Timor Leste (F-FDTL) no Polisia Nasionál Timor Leste (PNTL) durante semana ida atu minimiza violénsia no aktu kriminál iha territóriu nasionál liu-liu iha kapitál Dili, hodi garante paz no estabilidade iha Timor-Leste.

Despixu ne’e tama vigór iha loron assinatura iha Díli, 06 Setembro 2022  no termina iha tuku 23:59 dia 13 Setembru 2022, no bele renova bazeia ba avaliasaun.

Sira ne’ebé asina deklarasaun konjunta ne’e mak hanesan Ministru Defeza interinu Fidelis Manuel Leite Magalhães no Vise-Ministru Interiór  António Armindo.

Jornalista: Rogério Pereira Cárceres