Hatutan.com, (06 Setembru 2022), Díli- Sua Eminênsia Virgílio Cardeal do Carmo da Silva,  SDB, husu atu lider sira grupu arte marsiál (GAM) ho grupu arte rituál (GAR) mantein  fó orientasaun no eduka membru sira haburas virtude domin no dame hodi garante moris hakmatek iha  sosiedade.

Lee Mós : Komandu F-FDTL Husu bá “Maun-Boot” Sira GAM no GAR Kontrola Membru

Sua Eminénsia Dom Virgílio Cardeal do Carmo da Silva, SDB. Foto/Hatutan.com

Sua Eminénsia Dom Virgílio Cardeal do Carmo da Silva, SDB,  iha nia omilia missa agradesimentu iha Tasi-tolu, Díli, Tersa (06/09/2022), hateten ho re-ativasaun bá organizasaun arte-marsiál no arte-rituál sira iha fatin barak, haree katak mosu uniforme oin-oin hodi partisipa iha atividade kreda no mós nasaun nian.

Iha parókia sira mosu mai ho kór oin-oin halo asembleia uma kreda nian moris liután no ho kór oin-oin, maibé nafatin sai ida de’it no forte liu hodi tau bá kotuk buat ne’ebé halo ema hanoin oin-oin ho diferensa sira hodi halo di’ak no ida-ne’e mak hatudu kultura foun ne’ebé GAM no GAR presiza atu promove.

“Lider sira arte-marsiál nian iha nasionál too iha baze, há’u propoin atu imi hakiak iha foin-sa’e sira ne’e espíritu ida hatene kaer liman no servisu hamutuk, hatene diálogu, respeita malu no hadomi malu,” Dom Virgílio Cardeal do Carmo da Silva, SDB hateten.

Arsebispu Arkidioseze Metropolitana Díli ne’e hatutan molok ema hotu tau iha implementasaun dokumentu Fraternidade Umana ho maluk sira ne’ebé ho fiar lahanesan ka hosi relijiaun seluk, maibé di’ak liu ema hotu ne’ebé maske kór lahanesan no iha diferensa saida de’it tenke hanoin katak ho dokumentu Fraternidade Umana book ema nia fuan no laran atu ema hotu iha papel atu eduka no orienta foin-sa’e no adolexente sira bá valor no virtude kultura domin no dame.

“Ida ne’e mak Maromak nia liafuan ne’ebé kontinua hanorin ita oinsá bele promove dame no domin iha sosiedade, maibé dalaruma ita haree violénsia oin-oin buras iha ita-leet tamba ita haketak malu ho kór no diferensa ne’ebé iha hodi la obedese bá virtude be Maromak fó mai ita ema,” Nia hateten.

Ema hotu iha vokasaun atu haburas dame no domin, Maromak fó ba ema hotu oportunidade ida atu lao hamutuk hodi esperimenta Maromak nia domin iha ema ida-idak nia hela fatin no iha moris  hodi simu korajen foun atu bele husu atitude no komportamentu sira ne’ebé la saudavel no dala barak atu harahun valor kultura moris nian.

Lee Mós : PNTL Detein Autór Na’in-haat Deskonfia Baku Membru F-FDTL Iha Akadiruhun

Jornalista : Vito Salvadór