Hatutan.com, (31 Agostu 2022), Díli—Durante fulan juñu to’o jullu, Policia Ciêntífica e de Investigação Criminal (PCIC) rejista kazu 128, ne’ebé keixa hosi komunidade.

“Servisu pikete no prevensaun PCIC ninian, simu keixa direta hosi ita nia komunidade, no totál 128 kazu. Hosi 128 ne’e, krime burla ho ofensas integridade fízika makaas liu,” Portavós PCIC, Octávio da Costa Araújo hateten iha kna’ar fatin Caicoli, Kuarta (31/08/2022).

Lee Mós:Falsifika Dadus Veteranu, PCIC Submete Kazu 32 ba Ministériu Públiku

Durante fulan rua tutuir-malu, PCIC mós simu delegasaun kompeténsia hosi MP, ho totál kazu hamutuk 49. Hosi númeru kazu hirak ne’e, krime Burla ho Falsifikasaun dokumentus mak aas liu.

“Iha fulan rua ne’e mós, ita termina relatóriu finál ne’ebé prosesu la’o hela iha PCIC no ita haruka fila-fali ba Ministériu Públiku ho totál 30 prosesu. Entaun, prosesu ne’ebé mak agora iha PCIC nia liman, iha juñu, jullu to’o agostu nia laran, agora iha andamentu hela ne’e ho totál 68 prosesu,” Octávio da Costa Araújo, informa.

La’ós ne’e de’it, iha juñu to’o jullu PCIC mós ezekuta mandadu judisiál 5 ba krime Abuzu Seksuál ka Minoridade, Omesídiu, Tráfiku Umanu ida, Asosiasaun Kriminoza ida, ho Abuzu Konfiansa no Burla.

Oras-ne’e, PCIC halo hela ezame ba DNA ho prosesu hamutuk hitu, no provizóriu, PCIC haruka hela ba hala’o ezame iha Portugál.

Hala’o mós ezame toxikolójia lima, no kazu hirak ne’e balun hala’o ezame iha Timor no balun iha Portugál. Alende ne’e halo mós ezame ba falsifikasaun dokumentu nian hamutuk tolu, maioria iha Timor.

Hosi parte servisu laboratóriu nian seluk ne’ebé mak PCIC halo, mak hanesan durante fulan-juñu ho jullu ne’e sira halo ezame lokál do krime, tun ba terrenu hodi halo ezame lokál hamutuk 23 kazu, liu-liu ba iha Fraude Fiskál, Brankamentu Kapitál ho Tráfiku Umanu.

“Ida ne’e mak as liu. Fulan rua ne’e mós, ita rekolla identifikasaun judisiária no lofoskópia, katak ema ne’ebé mak ita konstitui arguidu, ita sei hasai sira ninia imprensoins dijitál ka sidik-jari. Ida-ne’e hamutuk 55 arguidu. Hosi 55 pesoas ne’e, barak liu komete ba iha krime Burla Agravadu, Maustratus ba Konjuga no Ofensas Integridade Fízika Grave,” Octávio da Costa Araújo, hateten.

Jornalista: Rogério Pereira Cárceres