Hatutan.com, (25 Agostu 2022), Díli—Polísia Nasionál Timor-Leste (PNTL), liuhosi Komandu Munisipiu Díli, unidade Polísia Tránzitu, iha (23/08/2022) halo auto stop ba transporte públiku no konsege detein sidadaun na’in-haat ho inisiál, MF, MS, ND, FC tanba laiha karta kondusaun.

Komandu Polísia Nasionál Timor Leste (PNTL) liu hosi Komandu Munisípiu Díli, hala’o pasa revista ba motorizada hirak ne’ebé halo movimentu iha estrada públiku, konsege prende motorizada 90 ne’ebé viola kódigu Estrada iha Kuarta (03/08/2022). Foto/PNTL.

“Iha dia 23 kalan, parte Tránzitu ninian mós halo operasaun ba transporte públiku sira ne’ebé mak nota katak, iha suspeitu balun laiha karta kondusaun no ita kaptura, agora daudaun detein iha parte detensaun munisipiu Dili ninian durante oras 72, depois aprezenta ba Ministériu Públiku,” Komandante PNTL Munisipiu Dili, Superintendente Xefe Polisia, Henrique da Costa, hateten iha Caicoli, Kinta (25/08/2022). 

Lee Mós: Operasaun Kalan, PNTL Prende Motór 51

Autór na’in-haat ne’e, PNTL foti iha fatin pasa revista iha Vera Cruz, iha Portu Dili nia oin. Evidénsia sira hanesan motorizada ne’e, parte unidade tránzitu rekolla hotu no oras ne’e mós estasiona hela iha Komandu Caicoli.

Komandante Henrique, fó hanoin ba motorista sira, bainhira konduz motór presiza atensaun ba iha dokumentu sira, hanesan importante liu mak karta kondusaun.

Durante ne’e, asidente tráfegu barak akontese iha Dili, tanba kuaze 40%, sidadaun sira laiha karta kondusaun.

“Tanba ne’e maka ita halo operasaun ne’e, kuandu hetan balun ne’ebé mak laiha karta kondusaun ne’e, ita asegura kedan mai iha ita nia fatin, hodi detein no prosesa ba iha Ministériu Públiku. Sira mós tenke selu koima,” nia hateten.

Alvu hosi operasaun kalan ida ne’e, haree liu kona-bá sasán kro’at sira, karik ema ruma lori hela durante sira ninia movimentu iha kapitál nasaun. Maibé durante pasa revista, laiha sasan kro’at ruma.

Jornalista: Rogério Pereira Cárceres