Hatutan.com, (20 Agostu 2022), Díli—Prezidente Repúblika (PR), José Ramos-Horta husu atu  instituisaun FALINTIL Forsa Defeza Timor Leste (F-FDTL) asegura povu Timor Leste no promove pás iha rai laran no mundu.

PR José Ramos-Horta simu ho parade militár bainhira vizita kuartel Jenerál F-FDTL, Segunda (04/07/2022). Foto/Hatutan.com

“Buat ne’ebé hatudu dalan ba forsa sira maka konstituisaun no juramentu ne’ebé forsa ida halo ba bandeira no konstituisaun hodi tane dame no servi povu,” Ramos-Horta hateten iha selebrasaun aniversáriu F-FDTL ba dala 47, iha Palásiu governu, Sábdu (20/08/2022).

Lee Mós: Ezisténsia FALINTIL Iha Tempu Rezisténsia Dignifika Povu TL

Timor Leste iha forsa atu servi dame, kontribui ba hametin dame iha rejiaun no mundu tanba misaun forsa defeza nian loloos maka defende konstituisaun, defende nasaun demokrátiku tuir órden no la tuir partidu polítiku nem tuir ema ida nia hakarak.

Komandante supremu F-FDTL ne’e hatutan, Governu tenke hahu haree tau kondisaun ba instituisaun F-FDTL atu sira mós iha responsabilidade ba situasaun umanitáriu sosiál hanesan hadi’a eskola, estrada rurál ruma no halo atendimentu publiku bainhira iha situasaun dezastre naturál sira.

Timor Leste laiha ameasa ruma husi liur tanba laiha inimigu no iha relasaun di’ak ho nasaun hotu-hotu iha mundu no iha relasaun metin ho nasaun viziñu sira hotu hanesan Indonézia, Austrália, Nova Zelándia, Malásia inklui ho nasaun sira seluk.

“Ita Timor Leste laiha inimigu no adversáriu rejional ou global maibé ita tenke prepara nafatin liliu iha parte mediku atu uainhira iha tempu pas ita nia forsa bele ativu servi povu,” nia dehan.

Iha Agostu 2000 iha Aileu bainhira Kay Rala Xanana Gusmão sees an hosi komandu FALINTIL Ramos-Horta entrega ba maun boot Xanana medalla prémiu nobel da pas ne’ebé nia simu lori povu nia naran iha Oslo, Noruega iha Dezembru 1996.

Medalla ne’e nia entrega ba Kay Rala Xanana Gusmão, maibé tanba nia hases an hosi FALINTIL, entaun Ramos-Horta entrega medalla ne’e ba Taur Matan Ruak hanesan komandante FALINTIL ne’ebé simu todan hosi Kay Rala Xanana Gusmão.

Hosi Taur Matan Ruak entrega ba Lere Anan Timur no husi Lere entrega ba Falur Rate Laek ne’ebé oras ne’e medalla Nobel da pás ne’e iha Ministériu Defeza no iha Komandu F-FDTL.

“Unika instituisaun militár iha mundu ne’ebé premiadu nobel da pas entrega medalla osan me’an maka instituisaun F-FDTL,” nia afirma.

Jornalista: Vito Salvadór