Hatutan.com, (18 Agostu 2022), Díli—Vise Prezidente Parlamentu Nasionál (V-PPN), Maria Angelina Lopes Sarmento, Kuata kalan (17/08/2022), hetan asidente tráfiku “karreta baku-fila” iha área Bua-Lo, Aldeia Tori-Lalan, Suku Orlalan, Postu Administrativu Laclubar, Munisípiu Manatuto.

Karreta PN ne’ebé transporta Vise PPN, Maria Angelina Sarmento, “baku-fila” iha área Munisípiu Manatuto, Kinta kalan (17/08/2022). Foto/Supply

Foto ne’ebé daudaun ne’e espalla iha media sosiál Facebook no fahe tutan iha grupu WhatsApp sira, hatudu katak, Vise-PPN Maria Angelina Lopes Sarmento, hosi Partidu Libertasaun Popular (PLP) hetan dezastre ho karreta Parlamentu Nasionál nian bainhira hala’o viajen ida.

Karreta marka Prado ho xapa matrikula kór-mean PN 2   kondús hosi  Vise PPN nia katuas oan rasik  ne’ebé rezultadu Vise-PPN, Maria Angelina Lopes Sarmento, hetan kanek kaman, inklui  motorista alias nia katuas oan ho oan na’in-rua.

Daudaun ne’e, Vise-PPN ho nia família  evakua ona mai halo tratamentu intensivu iha Hospital Nasionál Guido Valadares (HNGV) Díli.

Kronolojia Polísia

Informasaun kona-bá kronolojia asidente ne’ebé  Hatutan.com asesu hosi Polísia Nasionál Timor-Leste (PNTL) Munisípiu Manatuto katak  iha loron 17 fulan-Agostu 2022, hale’u   tuku 20:00 Otl, akontese asidente “karreta baku-fila” ne’ebé transporta Vise-PPN Maria Angelina Sarmento iha área Bua-lo, Aldeia Tori-lalan, Suku Orlalan, Postu Laclubar.

Karreta Parlamentu Nasional nian ne’e, tuir informasaun katak kondús hosi Vise PPN, Angelina Sarmento nia katuas oan rasik. Ema ne’ebé mak asidente hamutuk na’in-haat (4);

Karreta Prado Vise PPN nian sei iha fatin asidente. Foto/Supply

Vise PPN, Angelina Sarmento hetan sofre iha parte hirus matan, kanotak no ain rua,  maibé lá tohar, Vise PPN nia katuas oan ne’ebé kondús karreta refere hetan sofre iha parte hirus matan, Vise PPN nia oan mane hetan sofre kanek iha parte ulun no Vise PPN nia oan feto nia ain de’it mak bubu.

Motivu hosi asidente ne’e tamba Vise PPN nia katuas oan kondús karreta hola liuhosi estrada ninin, ne’e-duni rai-mamar  hodi rezulta karreta baku fila.

Hosi foto ne’ebé viral iha Facebook no fahe tutan ona iha grupu WhatsApp sira hatudu mós katak   karreta marka Prado ne’e iha hela fatin asidente no autoridade seguransa iha área jurizdisaun Munisípiu Manatuto nian bá dada ona vita polisia (police line) hale’u karreta ne’e.

Deputada Maria Angelina  Lopes Sarmeto, moris iha Lahane Oriental, Munisípiu Dili, iha loron 10 fulan-Jullu 1978, ne’ebé hahú nia funsaun hanesan Deputada hosi Bankada PLP iha loron 13 fulan-Juñu 2018. 

Jornalista : Regério Cárceres