Hatutan.com, (04 Agostu 2022), Díli—Komandu Polísia Nasionál Timor Leste (PNTL) liu hosi Komandu Munisípiu Díli, hala’o pasa revista ba motorizada hirak ne’ebé halo movimentu iha estrada públiku, konsege prende motorizada 90 ne’ebé viola kódigu Estrada iha Kuarta (03/08/2022).

Komandu Polísia Nasionál Timor Leste (PNTL) liu hosi Komandu Munisípiu Díli, hala’o pasa revista ba motorizada hirak ne’ebé halo movimentu iha estrada públiku, konsege prende motorizada 90 ne’ebé viola kódigu Estrada iha Kuarta (03/08/2022). Foto/PNTL.

Komandu Munisípiu Díli, hatun diretiva ba Komandante Eskuadra sira, hamutuk ho Seksaun Tránzitu Munisípiu Díli hodi hala’o servisu operasionál liu hosi patrullamentu la’o ain hodi halo monitorizasaun iha kada Suku inklui halo mós prevensaun seguransa rodoviária iha kapital Díli liu hosi pasa revista ba motorizada hirak ne’ebé halo movimentu iha estrada publiku ne’e, tanba hetan orientasaun hosi Komandu Jerál Polísia Nasionál Timor Leste (PNTL).

Lee Mós: Operasaun Kalan, PNTL Prende Motór 51

Komandante PNTL Munisípiu Díli, Superintendente Xefe Polísia, Henrique da Costa konsidera atividade ne’e realiza hodi eduka nafatin sidadaun sira atu respeita kódigu estrada.

“Ohin kalan hanesan baibain ita orienta eskuadra PNTL sira kontinua hala’o knaar operasaun rutina hodi halo auto stop ba motorizada sira ne’ebé halo movimentu iha tempu kalan hodi halo prevensaun ba asidente tráfiku no dezenvolve kampaña seguransa rodoviária nune’e bele eduka nafatin ita nia sidadaun sira hodi respeita Lei sira Tránzitu nian,” Hatutan.com sita deklarasaun Komandante Henrique iha komunikadu.

Atividade ne’e mós hala’o hodi kontrola jestaun veíkulu no kria ambiente kondusaun seguru ne’ebé efikás no efisiente ba motorista sira inklui haree mós ba sasan kontra bandu sira seluk.

“Ita foka de’it ba motorizada no ita halo aprensaun ba motór 90 kompostu hosi motór 49 prende iha Eskuadra Cristo Rei, Becora no Dom-Alexo ne’ebé halo check point iha Raikotu Comoro prende motór 41. Enkuantu, totál 90 ne’ebé viola dekretu lei no.6/2003, Kódigu Estrada,” nia esplika.

Iha pasa revista ne’e, konsege identifika sidadaun barak mak kontra kódigu Estrada tanba la monta asesores hanesan xapa matríkula oin kotuk, lampu no espellu laiha, la uza kapasete, uza kanu racing halo barullu no maioria laiha karta kondusaun.

Motorizada hirak ne’e sei entrega hikas ba na’in, maibé tenke liuhosi prosesu administrasaun lori nota infrasaun ba selu multa iha Banco Nacional de Comércio de Timor-Leste(BNCTL) hafoin mai foti fali sira nia motor.

Observasaun SRP iha terrenu haree katak, patrulla la’o ain hala’o hosi eskuadra Na’in-Feto, Vera-Cruz, Metinaro.

Pasa revista hala’o hosi Eskuadra PNTL Cristo-Rei no Esquadra PNTL Dom Aleixo no hetan apoiu hosi Servisu Investigasaun Kriminál, Servisu Informasaun Polísia no Seksaun Forsa Rezerva, hodi apoiu Seksaun Tránzitu Díli.

Jornalista: Rogério Pereira Cárceres