Hatutan.com, (28 Jullu 2022), Díli—Polísia Nasionál Timor Leste (PNTL) liu hosi Komandu Munisípiu Díli, asegura joven na’in-tolu ne’ebé tulu malu ho motór ida ne’ebé laiha xapa matríkula.

Membru PNTL Díli hala’o patrullamentu iha kalan, Kinta (28/07/2022). Foto/PNTL.

PNTL asegura joven na’in-tolu ne’e bainhira reforsa efetivus hosi Esquadra PNTL lima mak hanesan, Dom-Aleixo, Cristo-Rei, Na’in-Feto, Vera-Cruz no Metinaro, halo operasaun patrulla ho karreta inklui la’o ain iha tempu kalan, hodi garante seguru ba komunidade iha kapitál Díli.

Lee Mós: PNTL Díli Sei Intensifika Operasaun La’o Ain iha Kalan

“Ohin kalan ita orienta Eskuadra PNTL lima, halo operasaun rutina la’o-ain tama-sai iha área risku sira ne’ebé sempre akontese problema hodi garante situasaun hakmatek iha komunidade nia leet. Iha operasaun ne’e ita konsege asegura joven na’in-tolu tula-malu iha motorizada ida laiha xapa matrikula no ita sei entrega ba seksaun tranzitu Díli,” Hatutan.com sita deklarasaun Komandante PNTL Munisípiu Díli, Superintendente Xefe Polisia Henrique da Costa, iha komunikadu.

Superintendente Xefe Polísia Henrique da Costa, konsidera operasaun ne’e atu antesipa krime ne’ebé akontese iha Dili laran.

Durante operasaun ne’e mós membru PNTL identifika joven sira ne’ebé halo halibur-malu hodi hemu tua iha tasi-ibun no dalan públiku, haruka fila ba uma tanba bele kauza ba asidente no insidente.

“Tuir orientasaun Komandante Jerál PNTL, ita intensifika volume atividade patrullamentu la’o ain iha tempu kalan, haree mós ba movimentu joven sira ne’ebé uza motór halai makas la uza kapasete no xapa matrikula inklui sira ne’ebé halo agrupamentu hemu lanu iha dalan públiku, ita foti medida prevensaun hodi evita hahalok sira ne’e bele fó risku ba sira nia vida,” nia hateten.

Operasaun ne’e hetan apoiu rekursu hosi Forsa Rezerva envolve mós ekipa servisu sekreta Munisipiu Dili, ne’ebé halo movimentu hodi informa ba ekipa patrulla sira atu responde ho lalais.

Jornalista: Rogério Pereira Cárceres