Hatutan.com, (28 Jullu 2022), Díli—Ministériu Justisa (MJ) identifika ona empreza nasionál no internasionál 20-resin ne’ebé fó aluga tutan rai Estadu no fa’an fali ba ema seluk la hó autorizasaun hosi Governu.

Rai Estadu balun iha área Bebonuk, Díli, ne’ebé Estadu estabelese kontratu arrendamentu ho empreza balun maibé to’o agora abandonadu. Foto/Hatutan.com.

“Iha ona empreza nasionál no internasionál 20-resin ne’ebé arrenda tutan ba ema seluk sen koñesimentu hosi MJ. Iha ona númeru balun ne’ebé fa’an fali rai Estadu ba parte seluk, maibé ha’u labele temi naran no atu dehan de’it katak ida-ne’e konsumu ona krime,” Ministru Justisa, Tiago Amaral Sarmento hateten iha Colmera, Kinta (28/07/2022).

Lee Mós: Atribuisaun Sertifikadu Rai Sei Hahú Hosi RAEOA

Tanba ne’e, Gabinete Inspensaun MJ sei halo inspensaun, bainhira rezultadu relatóriu hatudu hanesan ne’e maka sei halo partisipasaun ba Ministéru Públiku (MP) tanba ne’e konsumu ona krime fraúda fiskál tanba la selu taxa ba Governu no kontra lei Tributária.

Iha kontratu arrendamentu ne’ebé Governu selebra ho emprezáriu sira hakerek momos katak, parte hirak ne’ebé arrenda uma no rai Estadu, laiha kompeténsia no dirietu hodi fó aluga tutan ka fa’an ba ema seluk sen rekoñesimentu MJ, bainhira akontese ne’e krime.

Bainhira fó ona aluga ba ema seluk, konserteza folin la hanesan ho Governu nian no la selu taxa, maibé bainhira iha autorizasaun hosi Governu maka sei aplika folin ne’ebé ki’ik labele bo’ot liu ho folin ne’ebe Governu fó ba nia.

Jornalista: Carmelita Isaac