Hatutan.com, (18 Jullu 2022), Díli– Membru militár sira husi Ezérsitu Estadus Unidus Amérika no Forsas Defeza Timor-Leste (F-FDTL),  Segunda (18/07/2022), lansa Dalan bá Dame 22 (“Path to Peace”), Ezersísiu militár konjuntu daruak entre ezérsitu sira husi Timor-Leste no Estadus Unidus Amérika.

Membru militár sira husi Ezérsitu Estadus Unidus Amérika no Forsas Defeza Timor-Leste (F-FDTL), Segunda (18/07/2022), lansa Dalan bá Dame 22 (“Path to Peace”), Ezersísiu militár konjuntu daruak entre ezérsitu sira husi Timor-Leste no Estadus Unidus Amérika. Foto/Espesiál EUA

Ezersísiu militár ne’e sei hala’o iha loron 10, hahú husi loron 18 to’o loron 28 fulan-Jullu iha Baze Komponente Terrestre F-FDTL nian iha Baucau.     

 “Ezersísiu Dalan bá Dame nu’udar ezemplu importante ida kona-bá oinsá Estadus Unidus no Timor-Leste hakle’an liután ami-nia parseria rohan laek,” Vise Xefe Misaun Interinu Estadus Unidus Amérika nian Roy Srinivasan hateten liuhusi komunikadu imprensa ne’ebé Hatutan.com asesu.

“Estadus Unidus sente orgullu halo parseria ho F-FDTL hodi dezenvolve Timor-Leste nia kapasidade bá seguransa marítima, asisténsia umanitária, no responde ba dezastre. Ezersísiu konjuntu ba dala rua ne’e reforsa kompromisu Estadus Unidus Amérika nian hodi serbisu hamutuk ho Timor-Leste atu hatán ba dezafiu hirak ne’ebé nasaun rua ne’e hasoru.”  

Ezersísiu ida-ne’e patrosina husi Estadus Unidus Amérika nia Ezérsitu iha Pasífiku, envolve membru sira militár Estadus Unidus nian besik na’in-50 no F-FDTL na’in-100 ho objetivu hasa’e kapasidade interoperabilidade liuhusi treinamentu no interkámbiu kulturál.

Treinamentu ne’e inklui interkámbiu asuntu espesializadu no hala’o semináriu dezenvolvimentu profisionál ne’ebé foku ba abilidade báziku sira infantaria nian hanesan patrullamentu, navegasaun terrestre, no abilidade sobrevivénsia iha ai-laran.

Ezersísiu ida-ne’e dezenvolve bazeia bá parseria ne’ebé aumenta entre Estadus Unidus Amérika no Timor-Leste no promove liután kooperasaun seguransa hodi apoia rejiaun Indo-Pasífiku ida ne’ebé livre no nakloke.

Dalan bá Dame 22 dezenvolve bazeia bá parseria seguransa entre Estadus Unidus Amérika no Timor-Leste, liuliu Estadus Unidus nia kompromisu osan millaun $10-resin hodi hamutuk ho Governu Timor-Leste reabilita aeródromu Baucau.

Liuhusi kria Komponente Aéreu ida, projetu ne’e sei fó asisténsia bá F-FDTL no ajuda Governu Timor-Leste hodi monitoriza di’ak liután ninia territóriu marítimu, fornese asisténsia umanitária no promove dezenvolvimentu ekonómiku.

Estadus Unidus Amérika mós hala’o ezersísiu militár anuál hamutuk tolu ho F-FDTL no simu membru militár Timoroan barak iha Estadus Unidus hodi aprende lian Inglés no hetan edukasaun profisionál militár nian. Aleinde ne’e, Estadus Unidus Amérika nia Navál Seabees konstrui no reabilita ona klínika no eskola 100-resin iha Timor-Leste hodi ajuda harii futuru ida ne’ebé di’ak liu ba Timoroan sira, sira mós kompleta ona projetu lubuk ida ho valór millaun $50-resin iha tinan 10 nia laran.

Jornalista : Rogério Cárceres