Hatutan.com, (11 Jullu 2022), Díli- Prezidente Repúblika (PR), José Ramos-Horta, hateten adezaun Timor-Leste bá Organizasaun Mundiál Komérsiu (OMK) sei fó impaktu pozitivu bá ekonomia Timor-Leste.

Lee Mós : Governu TL Kontinua Aselera Prosesu Adezaun ba OMK

Ministru Koordenadór bá Asuntu Ekonomiku (MCAE), Joaquim Amaral. Foto/Hatutan.com

“Ha’u satisfeitu no kontente ho Timor-Leste nia adezaun bá OMK ne’ebé sei akontese iha 2023 no Timor-Leste nia adezaun bá OMK sai prioridade ás liu iha ha’u nia mandatu,” Prezidente Repúblika, José Ramos-Horta, haktuir hafoin simu delegasaun traballu adezaun Timor-Leste bá OMK iha Palásiu Prezidensiál, Segunda (11/07/2022).

Ministru Koordenadór bá Asuntu Ekonomiku (MCAE), Joaquim Amaral, lori delegasaun OMK ne’ebé lidera husi Prezidente Grupu Traballu Timor-Leste nian bá adezaun mak Embaixadór Rui Maceira, Embaixadór Portugál bá misaun permanente iha Jenebra nune’e mós Embaixadór Timor-Leste bá misaun reprezentasaun  permanente Timor-Leste nian iha Jenebra.

Timor-Leste simu ona husi OMK kalendáriu indikativu bá Timor-Leste ninia adezaun, tanba ne’e mak ekipa servisu maka’as liu husi grupu traballu ne’ebé iha hodi halo enkontru sira nu’udár preparativus sira  bá Timor-Leste nia adezaun.

Grupu traballu husi Jenebra xefia husi Embaixadór Rui Maceira ho ekipa Sekretariadu mai Timor-Leste atu bele hasoru malu ho Xefe Estadu, Xefe Governu, Prezidente Parlamentu Nasionál ho entidade hotu-hotu atu bele rona, hatene Timor-Leste ninia prontidaun bá iha OMK.

Enkontru sira ne’e hola parte mós ba Timor Leste nia adezaun nune’e órgaun soberanu sira presiza atu hatene diretamente husi Sekretariadu, Prezidente Grupu Traballu ne’ebé servisu maka’as tebe-tebes lobi bá Timor Leste ninia adezaun.

Iha prosesu adezaun ba iha OMK pilar tolu ne’ebé pais ida tenke liu husi iha level multilaterál, bilaterál nune’e mós trilateral, nivel bilaterál servisu hela atu konklui TL nia negosiasaun bilaterál bá asesu merkadu bens servisu.

“Nasaun sia mak agora tama iha lista, iha negosiasaun bilaterál, felizmente nasaun rua Austrália ho Nova Zelándia, ita konklui negosiasaun bilaterál ne’ebé ita anunsia formalmente iha fulan-Juñu liubá iha Jenebra,” Nia dehan.

Timor Leste hein katak vizita ida ne’e peranti Prezidente Grupu Traballu ho delegasaun OMK bele asina tan negosiasaun bilaterál Nova Zelándia ho Austrália, nune’e mós atu termina tan negosiasaun ho pais sira seluk ne’ebé sei iha lista.

Jornalista: Vito Salvador