Hatutan.com, (07 Jullu 2022), Díli– Diresaun Nasionál Servisu no Rejistu Notariadu (DNRN)  iha Díli no munisipiu sira seluk iha territóriu nasionál, daudaun ne’e, la bele halo atendimentu bá sidadaun sira ne’ebé atu halo pasaporte tanba sistema avaria.

Lee Mós : Mákina Prodús BI iha Munisípiu Ne’en Kontinua Aat

Sidadaun sira nakonu iha Direção Geral dos Serviços de Registo e Notariado (DGSRN) Díli hodi trata sira-nia pasaporte, 20 Juñu 2022. Foto/Dok. Hatutan.com

“Dezde Sesta semana kotuk, seidauk halo atendimentu tanba sistema tomak avaria tanba ne’e maka labele halo prosesu to’o iha produsaun nian, inklui mós iha munisípiu sira, tanba sistema ida de’it bainhira iha nasionál avaria konserteza iha munisípiu mós avaria. Maibé, ida-ne’e bá deit pasaporte tanba bá dokumentu sira seluk ne’e prosesu lao normal,” Diretór Jerál Diresaun Nasionál Servisu no Rejistu Notariadu (DNRN), Crisogno da Costa Neto, responde Hatutan.com iha Díli, Kinta (07/07/2022).

DNRN fó ona aviza liu husi rede sosiál Facebook no kuadru avizu katak DNRN seidauk bele loke atendimentu bá prodús pasaporte bá kliente sira ho razaun sistema avaria no bainhira sistema di’ak maka foin bele loke atendimentu.

Atu solusiona problema refere, daudaun ne’e iha kompañia nasionál Visi Mitra ho nia parseiru kompañia internasionál Tales maka halo ona manutensaun ho valor manutensaun purvolta $400,000-liu.

Durasaun tempu ba prosesu manutensaun ne’e laiha, tanba ne’e hanesan estensaun kontratu tuir lei aprovizionamentu ne’ebé labele liu prazu kontratu ne’ebé antes ne’e halo ona ho durasaun tinan ida, maibé karik lais liu maka semana ida nia laran bele di’ak ona.

Jornalista : Carmelita Isaac