Hatutan.com, (24 Juñu 2022),Díli– Governu Timor-Leste liu husi Ministériu Justisa (MJ), Sesta (24/06/2022), ofisiálmente selebra ona kontratu arrendamentu rai Estadu ho Pertamina Internasionál Timor SA. Ho nune’e, Pertamina Internasionál Timor SA iha obrigasaun atu selu $10,000 kada fulan bá Estadu Timor-Leste hanesan arrendatór bá rai Estadu durante períodu tinan-30 nia laran.

Lee Mós :   Pertamina Hetan Tratamentu Espesiál, Ramos-Horta Sei Haruka Nota Bá Governu “Hasai” Husi Pantai Kelapa

Ministru Jusitsa, Tiago Amaral Sarmento estabelese akordu arrendamentu ho Pertamina Internasionál Timor SA, Sesta (24/06/2022). Foto/Hatutan.com

Konteúdu seluk husi kontratu arrendamentu ne’ebé estabelese husi parte sira maka durante períodu tinan-30 nia laran fó tempu bá Pertamina Internasionál Timor SA  atu buka fali fatin seluk hodi harii baze Pertamina  tanba fó mós risku bá sidadaun sira ne’ebé hela besik.

“Bazeia bá dekretu lei nu. 19/2004 kona-bá arrendamentu konsidera rai ne’ebá hanesan domíniu Estadu Timor-Leste, tanba ne’e, hafoin Diresaun Nasional Teras no Propriedade hato’o relatóriu levantamentu dadus mai iha Ministru Justisa ne’ebé konklui ona,  ohin, ami selebra kontratu arrendamentu rai no propriedade ne’ebá lokaliza iha Pantai Kelapa, Díli  ne’ebé durante ne’e okupa husi Pertamina Internationál Timor SA ho valor kontratu kada fulan $10,000 durante períodu tinan-30, maibé bele extende tanba ne’e importante maka selu uluk lai arrendamentu ne’ebé durante ne’e ema hotu kestiona,” Ministru Justisa Tiago Amaral Sarmento, bá jornalista sira hafoin selebra kontratu arrendamentu rai Estadu bá Pertamina Internasionál Timor SA iha Edifísiu Ministériu Justisa.

Kona-bá atu muda sai Pertamina Internasionál Timor SA bá fatin seluk, liuliu bá Liquiça tuir proposta husi Prezidente Repúblika (PR), José Manuel Ramos-Horta nian, maibé Ministru Justisa agumenta katak Governu fó tempu durante períodu kontratu tinan-30 bele buka fali fatin seluk, maibé la’ós ohin asina aban atu muda ona.

Lee Mós : Ministru Justisa Vizita Pertamina Internasionál Antes Asina Kontratu Arrendamentu Terrenu

Bazeia bá relatóriu husi DNTP katak Pertamina halo konsorsiu nune’e la’ós ona pertamina internasionál bazeia bá sertifikadu no lisensa husi SERVE katak iha sósiu ho emprezáriu lokal ida, ho nune’e Timor oan kuaze 90% servisu iha Pertamina ne’e.

MJ Tiago Amaral Sarmento akompaña husi Pertamina Internasionál Timor SA koalia bá jornalista sira hafoin estabelese akordu arrendamentu rai Estadu. Foto/Hatutan.com

Maske nune’e Governu deside aplika montante arrendamentu hanesan ho kompañia internasionál ho montante kada fulan $10,000 tanba hala’o atividade durante tinan barak ona.

Iha sorin seluk, CEO Pertamina Internasionál Timor SA, Benny Harto Wijaya,  kontente ho akordu ne’e tanba bele hetan konkordánsia bá utilizasaun rai Estadu, tanba ne’e nia parte sei kumpre  lei arrendamentu no akordu ne’ebé selebra ona ho Governu Timor-Leste.

“Ami agradese bá Governu TL ne’ebé bele finaliza ona kontratu arrendamentu rai Estadu nune’e ami bele fó kontribuisaun no ami prontu atu halo tuir lei ne’ebé vigora iha TL hodi suporta no fasilita mina mai TL,”  Benny Harto Wijaya.

Kona-bá atu muda fatin bá fali Liquiça ka fatin seluk, Benny Harto Wijaya, hateten presiza tempu hodi muda pertamina bá fatin seluk, maibé sei kontinua koordena ho Governu hodi selera  prosesu ne’e.

Lee Mós : Pertamina Internasionál Sei Kumpre Lei TL ba Arrendamentu no Prontu Selu Dívidas

Jornalista : Carmelita Isaac