Hatutan.com, (23 Juñu 2022), Díli-Nain ba empreza Sacom Timo- Leste Abílio Araújo komprometidu atu dada fibra óptika (cabo submarino) husi Singapura mai Timor-Leste. 

Lee Mós : Governu Kontrata Empreza ASN ba Akizasaun-Instalasaun Kabu Submariñu Fibra Óptika

Abílio Araújo. Foto/Hatutan.com

Hafoin hasoru malu ho Prezidente Repúblika (PR), José Manuel Ramos-Horta iha Palásiu Prezidensiál,  Kinta (23/06/2022),  Abílio Araújo hateten, Sacom TL ho nia parseiru  Enligo Network  mai hasoru malu ho Prezidente Repúblika hodi ko’alia kona-bá dezenvolvimentu ekonomia iha Timor-Leste, liu-liu atu haree saida mak grupu Sacom kontribui bá pobreza, kontribui bá dezenvolvimentu iha rai-ne’e.

Sacom hamutuk ho parseria Enligo Network dezenvolve hela empreza foun ida naran Sacomtel TL ne’ebé foin hetan aprovasaun no sei ho servisu iha área cabo submarino no Konsellu Ministru liu husi VIII Governu  hamutuk ho Autoridade Nasionál Komunikasaun fó ona legalidade.

“Ha’u lori mós ha’u nia parseiru Enligo Network, empreza ida ne’e dezenvolve ona kabu submarinu iha fatin lubuk no investimentu ida-ne’e liu millaun $800 no sei dada cabo submarino husi Singapura liu husi Tasi Java mai Alor nian husi ne’ebá fila bá leste no tun bá Darwin,” Abílio Araújo informa bá jornalista sira hafoin hasoru malu ho PR Horta.

Investimentu Sakomtel Timor Leste subway cable 100% privadu no cabo submarino liga bá kabu internasionál grupu Enligo nian ne’ebé naran Ázia Conect Cabel (ACC). Iha empreza foun ida husi kompañia naran Oceano IT to’o iha Timor bá halo ona nia fatin.

Ho cabo submarino ida-ne’e Timor-Leste bele dezenvolve Data Center ida bolu naran TR 3 data Center ne’ebé sei buka mós empreza boot husi mundu tomak bele mai haloot sira-nia data iha Timor. Tanba iha Ázia Pasífiku pais ida ho Data Centre boot liu mak Singapura no agora iha Singapura rasik data nakonu liu ona tanba enerjia ka power iha Singapura la to’o atu simu tan Data Center foun.

“Ho investimentu foun ida ne’e sei dezenvolve ekonomia dijitál iha Timor, no ita mós bele sai fali sentru ida bá Data Center no ne’e sei tau Timor iha fatin loloos iha mundu ne’e,” Abílio Araújo hateten.

Xefe Estadu kontente rona novidade husi esforsu Sacomtel nian ne’e  no ko’alia mós kona-bá dezenvolvimentu bá oin, inklui simu konvite atu akompaña vizita Prezidente Repúblika nian bá Indonézia iha fulan-Jullu ne’e.

Iha parte seluk reprezentante Enligo Network, Simon hatete sira-nia parte servisu  ho Sacom TL hodi halo konektividade bá cabo submarino mai Timor-Leste no sei haka’as an atu oferese servisu ida di’ak liu iha área teknolojia nian hodi ajuda hametin fundasaun teknolojia husi Timor-Leste bá mundu.

Abílio Araújo Aseita ho Kargu Membru Konsellu Estadu

Xefe Estadu mós ko’alia ho Abílio Araújo kona-bá nia nomeasaun bá membru Konsellu Estadu.

“Ha’u dehan iha tinan 20 ne’e nia laran, ha’u laiha pozisaun iha órgaun Estadu nian, ne’e primeiru vez no ha’u prontu, tanba ha’u nunka fila kotuk bá ita-nia rain, bá ita-nia povu tanba ne’e mak ha’u iha ne’e hela dezenvolve Sacom grupu iha área enerjia, konstrusaun no selu-seluk tan.”

Abílio Araújo aseita ho nomeasaun ne’e tamba órgaun ida ne’e órgaun Konstituisaun mak kria no órgaun ida ne’e iha membru ne’ebé Xefe Estadu rasik mak nomea no nia aseita kleur tiha ona tanba antes ne’e iha ona kontaktu via telefónika.

Jornalista: Vito Salvador