Hatutan.com, (17 Juñu 2022), Díli—Ministru Finansas (MF), Rui Augusto Gomes Inaugura Konferénsia Janela Únika Eletróniku, hanesan sistema koneksaun ne’ebé sei ajuda Autoridade Aduaneira atu kolleta reseitas ho maneira ida ne’ebé justu no transparente.

Ministru Finansas (MF), Rui Augusto Gomes Inaugura Konferénsia Janela Únika Eletróniku, hanesan sistema koneksaun ne’ebé sei ajuda Autoridade Aduaneira atu kolleta reseitas ho maneira ida ne’ebé justu no transparente, iha Salaun City 8, Sesta (17/06/2022). Foto/Média MF.

“Ita halibur hamutuk iha dadeer ne’e ho tema: “Janela Úniku Nasionál – Halo Komérsiu fásil liu, lailais liu, no baratu liu iha ambiente komérsiu ida ne’ebé mais transparente, previsível no kompetitivu,” Hatutan.com sita deklarasaun Ministru Finansas, Rui Gomes iha diskursu abertura Konferénsia Nasionál Janela Úniku Eletróniku, iha Salaun City 8, Sesta (17/06/2022).

Lee Mós: Fundu Mina-rai Billaun $19,1

Tema ida ne’e kontempla hela mensajen importante xave tolu maka hanesan:

✅ Melloramentu iha efikásia, burokrasia, transparénsia, sinerjia entre instituisaun Governu, no entre instituisaun Governu no komunidade komérsiu;

✅ Redusaun iha tempu trata asuntu komérsiu ho ajénsia Governu & Autoridade Aduaneira no iha uzu sura-tahan;

✅ Kresimentu iha volume no eskala atividades komérsiu, no iha koleksaun reseitas.

Timor-Leste labele kontinua depende ba Fundu Petrolíferu, liuliu ba longu-prazu. Deklina fiskál sei sai realidade iha tinan sanulu oin mai, anaunser Timor-Leste dezenvolve fontes reseitas alternativu sira seluk.

Tambá ne’e, tempu to’o ona atu hahú diversifika produsaun ra-laran, harii ekonomia ida ne’ebé mak mais reziliente no sustentável, hodi hasoru xoke sira interna no esterna hanesan pandemia no dezastre naturál.

Hosi prespetiva Ministériu Finansas, daudaun ne’e implementa hela reforma Fiskál no Jestaun Finansas Públikas – polítika reforma ida ne’ebé mak inísia ona iha tinan 2015 hosi Sestu Governu Konstitusionál ne’ebé lidera hosi Primeiru-Ministru, Rui Maria de Araújo.

Tanbá haree ba importánsia hosi polítika ida-ne’e, Oitavu Governu Konstitusionál komprometidu atu kontinua implementa ajenda reforma ida-ne’e.

Tinan kotuk, hamutuk ho Ministériu Koordenadór Asuntu Ekonómiku, Diresaun Jerál Komérsiu, MTKI, SAMES,E.P, APORTIL, I.P no Kuarentena, lansa ona Janela Úniku Nasionál, ASYCUDA World.

Plataforma online ida-ne’e liga Autoridade Aduaneira ho liña ministériu, ajénsia autónoma no institutu públiku sira ne’ebé mak trata movimentu ema, sasán no servisu sira.

“Ho sistema koneksaun ne’ebé mak aplika iha servisu administrasaun públiku, Ha’u fiar, sei redús atrazu, redús kustu tranzasaun, inklui tempu libertasaun sasán iha fronteira terrestres, portu no aeroportu. Sistema koneksaun ne’e mós sei ajuda Ita-nia Autoridade Aduaneira atu kolekta reseitas ho maneira ida ne’ebé justu no transparente. Servisus hirak ne’e sei sai relevante liután hahú husi fulan-novembru ba oin bainhira Portu Tibar hahú nia operasaun,” nia hateten iha komunikadu.

Tambá ne’e, Rui Gomes apresia liña ministériu, ajénsia autónoma no institutu públiku sira hotu ne’ebé mak implementa ona programa ida-ne’e, no enkoraza liña ministériu relevante sira seluk atu ativamente kolabora, engaja hodi aselera implementa sistema ne’e iha servisu fatin.

Jornalista: Rogério Pereira Cárceres