Hatutan.com, (01 Juñu 2022), Díli-Selebrasaun loron mundiál ba Labarik sira tinan-ne’e diferente ho tinan sira liubá.

PR Ramos-Horta halibur labarik besik atus tolu hodi selebra loron mundiál labarik iha Palasíu Prezidensiál, Dili, 01 Juñu 2022. Foto/Hatutan.com

Se tinan-tinan sira liubá iha loron 01 fulan-Juñu, labarik sira haksolok malu iha sira nia loron espesiál ne’e iha resintu eskola nian ka iha de’it fatin sira ne’ebé pertinente (depende ba komisaun organizadora). Maibé, Kuarta (01/06/2022), labarik sira besik atus tolu (300) ho ksolok halibur malu ho Prezidente Repúblika, José Manuel Ramos-Horta iha resintu Palásiu Prezidensiál.

Labarik sira ho roupa  la’ós formal halimar ho haksolok iha resintu Palásiu Prezidensiál hamutuk ho Prezidente Repúblika, José Ramos-Horta.

Sira barak mak la akompaña husi sira-nia inan ho aman. Sira kontente bele hakat ho livre iha jardín Palásiu Prezidensiál nian ne’ebé tinan barak taka bá públiku atu asesu livre hanesan ohin loron.  

Prezidente Repúblika, José Ramos-Horta mós haksolok tebes haree labarik sira ho orgullu bele hasoru direta Xefe Estadu Timor-Leste nian ne’e, hodi kaer-liman, foto hamutuk to’o Prezidente Repúblika, oferese dose keck hodi selebra loron mundiál labarik nian iha Palásiu Prezidensiál.

José Ramos-Horta hateten, ohin, iha mundu tomak selebra loron internasionál labarik, nune’e iha Timor-Leste, Governu no Unicef selebra iha munisípiu Lautem no hanesan Xefe Estadu hamutuk ho labarik sira selebra iha resintu Palásiu Prezidensiál nian, mezmu la iha prenda espesiál atu oferese bá labarik lubun ne’e ida-idak.

PR Ramos-Horta halibur labarik besik atus tolu hodi selebra loron mundiál labarik iha Palasíu Prezidensiál, Dili, 01 Juñu 2022. Foto/Hatutan.com

“Ha’u bele oferese ai-han no liuliu ai-fuan bá labarik sira nu’udár parte ida atu fó edukasaun bá públiku oinsá labarik sira tenke konsumu ai-fuan atu hadi’a sira-nia nutrisaun la’ós han mak buat midar sira ne’ebé baratu no la di’ak ba saúde,” Ramos-Horta hateten.

Iha hasoru malu ho labarik besik atus tolu ne’e, Prezidente José Ramos-Horta fahe mós livriñu bá sira atu enkoraja sira badinas lee no tenke kuda iha sira kultura lee.

 “Ita haree iha armazén Prezidente Repúblika nian livru lubuk ida tamba ne’e aproveita oportunidade ne’e ita fahe livru bá labarik sira atu sira halo leitura mesak no sei lori bá mós labarik sira iha foho.” José Ramos-Horta hateten.

Observasaun Hatutan.com iha Palásiu prezidensiál hatudu labarik sira hahú konvida malu no halibur malu iha palasíu prezidensiál hahú tuku 15:30 otl hodi hein Xefe Estadu atu festeja no selebra ho sira kona-bá sira nia loron mundiál ne’e.

Jornalista: Vito Salvador