Hatutan.com, (30 Maiu 2022), Díli-Federasaun Internasionál bá Jornalista sira (IFJ, sigla Ingles) hamutuk ho nia aliadu Timor Leste Press Union (TLPU) ezije bá Ministru asuntu Parlamentár no Komunukasaun Sosiál (MAPKOMS), Francisco Martins da Costa Pereira Jerónimo, atu imediatamente dada-hikas keixa “Denúcia Caluniosa” hasoru jornalista no Xefe Redasaun mídia online Hatutan.com, Francisco Belo Simões da Costa.

Jornalista no Xefe Redasaun Hatutan.com, Francisco Belo Simões da Costa.

Liu husi komunikadu imprensa ne’ebé Hatutan.com asesu husi sítiu ofisiál IFJ nian relata katak MAPKOMS Francisco Martins da Costa Pereira Jerónimo, submete ona keixa bá Ministériu Públiku (MP) kona-bá akuzasaun “Denúncia Caluniosa” iha Kódigu Penal Timor-Leste nian relasiona ho publikasaun notísia Hatutan.com nian bá kazu projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Lee Mós: “Denúncia Caluniosa” La Ameasa Liberdade Imprensa iha TL

MAPKOMS Francisco Jerónimo reaje katak publikasaun notísia Hatutan.com nian ne’e la loos no Hatutan.com mó publika direitu bá resposta no retifikasaun husi MSPKOMS rasik.

Hafoin publikasaun sira kona-bá kazu instalasaun projetu Set-top Box/dexodificador RTTL,E.P ne’e, Ministru Francisco Jerónimo, halo keixa hasoru Francisco Belo, ne’ebé bá ona presta deklarasaun hanesan suspeitu iha Ministériu Públiku ka Prokuradoria Distritál Díli kona-bá kazu “Denúcia Caluniosa” tuir artigu 285 Kódigu Penal Timor-Leste.

Francisco Belo presta deklarasaun iha MP iha loron 23 fulan-Maiu ne’e no submete bá investigasaun durante minutu 30 liu, hahú husi tuku 09:00 to’o Tuku 09:36 Otl.

Bainhira jornalista Francisco Belo viola duni artigu 285 Kódigu Penal maka sei hetan sentensa prizaun tinan tolu (3) ka selu multa (koima).

Iha tinan 2017, jornalista na’in-rua husi Timor Post, Oki Raimundos ho Lourenco Martins, mós enfrenta ona justisa kona-bá “Denúncia Caluniosa” relasiona ho notísia balun iha relasaun ho eis-Primeiru Ministru, Rui Maria de Araújo ne’ebé publika iha tinan 2015, maske nune’e, akuzasaun ne’e absolve tiha husi Tribunál Distritál Dili iha loron 11 fulan-Juñu 2017.

TLPU rasik halo ona verifikasaun no analiza kle’an bá notísia sira Hatutan.com nian kona-bá kazu projetu instalasaun Set-top Box/dexodificador RTTL,E.P ne’e hatudu katak la iha violasaun ka infrasaun hasoru kódigu étika jornalístika no la halo violasaun bá prinsípiu universal jornalizmu nian no Lei Komunikasaun Sosiál.

“Ami ezije imediata bá Ministru Francisco Jerónimo atu rezolve disputa sira-ne’e liu husi mediasaun iha Konsellu Imprensa tanba jornalizmu la’ós krimi,” TLPU afirma.

IFJ rasik hateten, Governu tenke garante atu jornalista sita hotu hala’o nia knar profisionál ho livre no seguru.

IFJ husu responsabilidade husi ofisial Estadu sira ho autoridade sira atu bele hola responsabilidade bá garante liberdade imprensa no liberdade espresaun.

Artigu 285 Kódigu Penal kontroversu ho liberdade imprensa iha artigu 8 kona-bá Liberdade Imprensa ho artigu 9 kona-bá Liberdade Atu Ko’alia iha Lei Komunikasaun Sosiál. Ho nune’e, IFJ ezije Ministru Francisco Jerónimo atu imediatamente retira ka dada-hikas (mencabut) akuzasaun hotu hasoru jornalista Francisco Belo Simões da Costa.

Lee Mós:“Denúncia Caluniosa”, TLPU Husu MAPKOMS Rejigna-an

PM Taur Lamenta MAPKOMS Keixa Jornalista Hatutan.com ba Ministériu Públiku

MAPKOMS Halo Keixa “Denúncia caluniosa” Hasoru Xefe Redasaun Hatutan.com

Jornalista: Vito Salvadór