Hatutan.com, (29 Maiu 2022), Díli- Prezidente Repúblika, José Manuel Ramos-Horta, husu partidu polítiku hotu, inklui Frenti-Mudança tenke iha vizaun ida atu kontribui bá dezenvolvimentu nasionál.

III Kongresu Nasionál Partidu Frenti-Mudança hala’o iha salaun CNE, Dili, durante loron tolu, husi loron 27-29 fulan-Maiu 2022. Foto/Hatutan.com

Partidu Frenti-Mudança, dezde loron 27 to’o loron 29 fulan-Maiu ne’e, realiza  III kongresu nasional ho tema nasional: Hametin no Haforsa Partidu Frenti-Mudança hodi Serve Di’ak-liu Povu Timor Leste no sub-tema: Promove Desizaun Koletiva, Konsolida Atividade Ekonomia Nasional hodi Hametin Partidu Frenti-Mudança.

Bazeia bá lema partidu Frenti-Mudança nian ne’ebé hateten Pás, Demokrasia no Prosperidade. Prezidente Repúblika, José Manuel Ramos-Horta,  deklara nia orgullu ho partidu Frenti-Mudança ne’ebé konsistente ho nia ezisténsia maske enfrenta difikuldade oin-oin durante ne’e.

Horta hateten, Frenti-Mudança tenke nafatin organiza an, manan esperiénsia hodi inspira foin-sa’e sira atu nafatin iha korajen hodi haboot partidu Frenti-Mudança iha sosiedade atu nafatin fó kontribuisaun bá dezenvolvimentu nasionál.

“Harii partidu atu fó kontribuisaun bá dezenvolvimentu nasionál. La’ós harii partidu atu sai opozisaun hodi hanoin de’it atu hatuun-malu no buka poder polítiku bá interese grupu ka pesoál ida-rua nian,” Prezidente Repúblika, José Ramos-Horta, afirma bá kongresista sira Frenti-Mudança nian iha salaun Lalini Larigutu, CNE, Caicoli, Díli, Domingu (29/05/2022).

Horta hatutan, demokrasia multi partidária podér polítiku mai husi partidu polítiku sira ne’ebé organizadu no laiha dalan seluk tamba ne’e lideransa partidu polítiku tenke mai husi ema ne’ebé iha kredibilidade intelektual, signifika matenek iha kakutak no estratéjia politika bá sustentabilidade partidu polítiku nian, iha persistensia no la desiste ka la hakiduk hodi taka odamatan.

“Frenti-Mudança tenke hatuur vizaun ida matenek no fahe ho povu liuliu foin-sa’e sira atu manan votu husi povu,” Horta hateten.

Frenti-Mudança hatudu nia kompromisu no persistensia ho estratéjia politika no hatudu daudauk ona bá públiku liu husi kongresu nasional ba dala-III ne’e tamba maioria kongresista sira mesak joven no ne’e hatudu katak partidu hahú daudauk ona halo kaderizasaun atu partidu ne’e moris bá beibeik iha povu nia-let.

Iha fatin hanesan, ko-prezidente Partidu Frenti-Mudança, Cesar  Vital Moreira, agradese bá Prezidente Repúblika nia prezensa hodi mai hato’o mensajen bá delegadu no delegada sira partidu Frenti-Mudansa nian iha loron ikus kongresu nian nune’e foin-sa’e sira bele iha korajen bá sira-nia desizaun politika ne’ebé sira hili.

“Hodi militante no simpatizante hotu partidu Frenti-Mudança nia naran agradese bá Xefe Estadu bá mensajen di’ak hanesan motivasaun no korajen bá ami hotu iha partidu Frenti-Mudança,” Cesar Moreira hateten.

Partidu Frente-Mudansa sei kontinua halo diskusaun bá rejimentu partidu nian no sei aprezenta kandidatu husi kongresista sira bá eleisaun lideransa partidu Frenti-Mudança períodu 2022-2027.

Distúrbiu iha Kongresu Laran

Iha kongresu loron dahuluk  nian,  Sesta (2705/2022), akontese distúrbiu iha kongresu laran tanba Vise-Prezidente Frenti-Mudança, Egidio de Jesus, la aseita kongresu ne’e tanba viola rejimentu partidu nian.

Egidio de Jesus halo protesta no konsidera kongresu ne’e ilegál tanba kongresu atu hala’o tenke mai husi Prezidente Partidu Frenti-Mudança, José Luis Guterres “LUGU” la’ós Abel Ximenes “Larisina” maka konvoka fali kongresu.

Ho distúrbiu ne’e, kongresista sira uza forsa  hasai Egidio de Jesus husi kongresu laran maske tuir rejimentu Egidio rasik dehan, nia sei asume hela kargu hanesan prezidente interinu Frenti-Mudança nian.

“Ha’u sei halo rekursu tuir dalan legal bá legalidade kongresu ne’e nian. Hau sei lori kazu ne’e bá Tribunál,” Egidio de Jesus afirma.

Hosi sorin seluk, Abel Ximenes “Larisina” nu’udár konselleiru partidu Frenti-Mudança, esplika, Egidio de Jesus dezde loron 18-19 fulan-Dezembru 2021 la asume ona kargu prezidente interinu partidu, inklui partidu mós halo ona expulsa ona Egidio husi kargu vise-prezidente.

Partidu Frenti-Mudança realiza kongresu hodi hili estrutura foun partidu nian hafoin Jose Luis Guterres ne’ebé asume kargu nu’udar prezidente rezigna an husi nia kargu.

Jornalista: Vito Salvador