Hatutan.com (28 Maiu 2022), Díli—Ministra Saúde, Odete Maria Freitas Belo halo inaugurasaun ba edifísiu Izolamentu Covid-19, Mini Laboratóriu no fatin ba Hapara Fuma iha Gleno, Munisípiu Ermera.

Edifísiu Izolamentu Covid-19, Mini Laboratóriu no fatin ba Hapara Fuma iha Gleno, Munisípiu Ermera. Foto/Média MS.

Konstrusaun edifísiu ne’e iha rua, maibé ninia atividade iha tolu, konstrusaun primeiru kona-bá Izolamentu ba Munisípiu Ermera nian, ida seluk mak laboratóriu aumezmu tempu iha laboratóriu nia sorin iha espasu rua ba atividade hapara fuma tabaku nian.

“Edifísiu foun ne’e la’ós atu halo tratamentu ba moras Covid-19 nian maibé husu nafatin ba komunidade Ermera atu simu vasina kompletu, nune’e edifísiu ne’ebé iha bele uza ba atendimentu moras sira seluk ne’ebé nia númeru aas iha munisípiu ne’e,” Hatutan.com sita deklarasaun Ministra Saúde iha komunikadu, Sábadu (28/05/2022).

Governu oferese edifísiu ne’e ba komunidade Ermera ne’ebé presiza atendimentu ba iha situasaun krítiku ka emerjénsia molok tranfere pasiente bá fasilidade ne’ebé aas liu hanesan Hospitál Nasionál Guido Valadares (HNGV).

Bainhira iha tempu Covid-19 nian Parte Ministériu halo tratamentu ba pasiente sira hanesan ba kuidadu intensivu, ba kuidadu emerjénsia nian nune’e médiku lubuk ida mak hetan ona treinamentu kona-bá oinsá bele halo tratamentu ba pasiente ne’ebé ho emerjénsia no krítiku bele uza fatin sira ne’e ba tratamentu.

Iha edifísiu ne’e parte Ministériu Saúde monta kedan kama hamutuk 20-resin, nune’e Ministra husu ba responsável sira iha Serbisu Saúde Ermera atu halo identifikasaun ba rekursu umanu ne’ebé presiza fó apoiu ba atendimentu iha fatin foun ne’e depende ba nesesidade.

Partisípa iha serimónia inaugurasaun ne’e mak hanesan Reprezentante Organizasaun Mundiál Saúde iha Timor-Leste Arvind Mathur, Assistente Reprezentante UNFPA Timor-Leste Domingas Bernardo, Diretór Jéral Serbísu Korporativu Marcelo Amaral, Reprezentante Ajénsia Dezenvolvimentu Nasionál no seluk tán.

Jornalista: Carmelita Isaac