Hatutan.com, (27 Maiu 2022), Díli—Patrimóniu Estadu nian ne’ebé sosa ho orsamentu Estadu nian tenke iha marka “Karreta Estadu” ka uza xapa matrikula G.

Lee Mós : EDTL,E.P Uza Patrimóniu Estadu La ho Xapa Matrikula G

Karreta ho marka Xpander ne’ebé EDTL,E.P sosa ho orsamentu la uza xapa matrikula G. Foto/Hatutan.com

Iha órgaun Estadu balun hanesan Eletrisidade Timor Leste, Empreza Públiku (EDTL,E.P), foin lalais ne’e,  sosa karreta operasionál inklui karreta ho marka Prado bá Prezidente EDTL,E.P ho nia komisáriu na’in-rua seluk uza orsamentu Estadu, maibé karreta sira-ne’e la uza xapa matrikula G  ka uza de’it stiker logotipu EDTL,E.P taka iha karreta nia odamatan lolon.  

“Ami sei verifika rejimentu internu husi EDTL,E.P no ami simu ona informasaun refere, maibé tanba asuntu barak, ami seidauk halo koordenasaun hodi koloka ami-nia diresaun relevante sira hodi halo koordenasaun ho EDTL,E.P molok halo atuasaun tanba presiza haree rejimentu interna,” Adjuntu Komisáriu CAC bá asuntu Sensibilizasaun no Prevensaun, Luis Oliveira Sampaio, haktuir hodi responde Hatutan.com, Sesta (27/05/2022).

Luis Oliveira Sampaio esplika katak husi pontu de vista em-jerál rekursu Estadu ne’ebé finansia husi Orsamentu Estadu laiha ida maka iha direitu atu privatiza no rejimentu internal ne’ebé iha mós tenke ajusta ho prinsípiu jerál Estadu ne’ebé lei introdús ona.

“Laiha fatin bá kualkér instituisaun atu privatiza patrimóniu Estadu, tantu parte Eletrisidade Timor Leste, empreza Publika (EDTL,E.P) no sira seluk ne’ebé sei kontinua utiliza karreta Estadu ho xapa matrikula privadu,” Luis Sampaio hateten.

Hatán bá utilizasaun patrimóniu Estadu ne’ebé la uza xapa matrikula G ne’e,  Komisáriu Ezekutivu Servisu Tékniku EDTL, E.P, Latino Jerónimo, afirma katak Lei fó dalan bá EDTL,E.P uza patrimóniu Estadu liuliu veíkulu sira ho xapa matrikula privadu.

Letino Jerónimo esplika katak hafoin EDTL transforma an husi Diresaun Nasional Eletrisidade  Timor-Leste bá  EDTL, E.P iha loron 01 fulan-Janeiru 2021, iha dekretu lei 29/2020 loron 22 fulan-Jullu, kona-bá kriasaun EDTL, E.P, fó kompeténsia no autonomia tolu bá EDTL, E.P mak hanesan autonomia Finanseira, Administrativa no Judisiáriu no Patrimóniu Própriu.

Komisáriu Ezekutivu Servisu Tékniku EDTL, E.P, Latino Jerónimo bá Hatutan.com iha edifísiu EDTL, E.P, Caicoli, Tersa (17/05/2022),  hateten, bainhira EDTL, E.P uza matrikula  Governu (G),  se mak sei haree asset (patrimóniu) sira-ne’e iha Ministériu Finansas no karreta Estadu hotu ne’ebé iha tama iha Ministériu Finansas nia konta, maibé hafoin dekretu lei ne’e sai atribui podér bá iha EDTL, E.P atu sai na’in bá saida de’it mak empreza publika ne’e iha, inklui rai no patrimóniu sentrál elétrika, liña media, baixa no liña transmisaun inklui karreta.

Nia afirma iha karreta Estadu balun ne’ebé EDTL, E.P utiliza sei nafatin uza hela xapa matrikula G tamba ne’e EDTL, E.P halo hela komunikasaun ho Ministériu Finansas para bele atribui bá EDTL atu utiliza nu’udár patrimóniu rasik.

Tuir dekretu lei ne’ebé iha, nia hatutan, bainhira EDTL, E.P sosa karreta sira bele utiliza xapa matrikula privadu, maibé rejistu iha Diresaun Nasionál Transporte Terrestre ho naran. EDTL, E.P la’ós ona tutela ba iha Ministériu Obras Publika tamba ne’e iha autonomia rasik tuir regulamentu ka dekretu lei ne’ebé iha.

Latino Jerónimo esplika dekretu lei númeru 15/ 2012 id- ne’e la prevalese ona bainhira dekretu lei númeru 29/2020 mosu hodi kria empreza publika, tamba ne’e, nia parte husu atu ema hotu bele intende no presiza haree lei ida ne’ebé fó kompeténsia bá EDTL para hetan autonomia finanseiru, administrativa no jurisdisaun.

“Ba ha’u atu tau xapa matrikula privadu ka Governu, interese mak transporte iha para ema servisu tamba agora nesesidade kobre hotu-hotu,” Latino Jerónimo hateten.

Komisáriu Ezekutivu EDTL, E.P ne’e informa Diresaun Nasionál Patrimóniu Estadu iha Ministériu Finansa nian okos no tuir sira-nia entendimentu oinsá maibé lei 29/2020 fó kompeténsia atu EDTL ne’ebé nu’udár empreza publika sei kontrola no regula utilizasaun bá veíkulu sira hotu ne’ebé EDTL iha mézmu rejista ho xapa matrikula privadu.

Jornalista: Carmelita Isaac