Hatutan.com, (20 Maiu 2022), Díli– Iha selebrasaun aniversáriu transformasaun Asosiasaun Demokrata Timorese (ASDT) bá partidu Frente Revolusionáriu Timor Leste Independente (FRETILIN) bá dala-48 (20 Maiu 1974-2022), Sesta (20/05/2022),  Komité Sentrál FRETILIN (CCF-Sigla Portugés), rekoñese Tenente Jenerál Reformadu Lere Anan Timur hanesan membru segundu jerasaun CCF nian hodi atribui mós   kartaun militante nian.

Lee Mós : CPN-FRETILIN Rekoñese Lere Úniku Sobrevivente Segundu Jerasaun CCF

Prezidente partidu FRETILIN, Francisco Guterres “Lú Olo” kaer liman hodi simu Lare Anan Timur iha CCF, Comoro, Dili, 20 Maiu 2022. Foto/Hatutan.com

Iha serimónia ne’ebé hala’o iha CCF, Comoro, Díli, Sekretáriu Jerál FRETILIN, Mari Bin Amude Alkatiri, espresa nia kontente tanba bele simu fila-fali sira-nia kamarada maluk Lere Anan Timur iha CCF.

“Lori matebian sir- nia naran, sira ne’ebé husik ona ita, sira balu sei moris, ha’u hakarak entrega bá kamarada Lere, ohin sertifikadu de rekoñesimentu  membru no entrega kartaun  membru vitalísia,” Mari Alkatiri  hateten.

Kuadru ho militante sira FRETILIN nian ne’ebé atus resin asiste serimónia ne’e ho ksolok boot simu prezensa Lere Anan Timur hanesan sira-nia kamarada maluk no asset potensiál FRETILIN nian.

“Ha’u husu bá rai lulik, foho lulik sira hotu, bá Na’i Maromak, atu kamarada Lere bele moris naruk, para bele mós ita hamutuk lori FRETILIN ne’e bá nia fatin rasik,” Alkatiri hateten hodi entrega sertifikadu rekoñesimentu bá Lere Anan Timur.

Mari Alkatiri haktuir, kartaun militante ho sertifikadu rekoñesimentu ne’ebé CC entrega ne’e, sira emite dezde kedan 2015, no tuir loloos, atu entrega ona antes. Maibé, tanba iha tempu ne’ebá Lere Anan Timur sei asume kargu hanesan Tenente Jenerál bá intuisaun armadu F-FDTL, nune’e maka seidauk bele entrega bá na’in.

Sekretariu Jeral partidu FRETILIN, Mari Alkatiri, akompaña prezidente FRETILIN, Francisco Guterres “Lú Olo” simu prezensa Lere Anan Timur iha CCF, Comoro, Dili, 20 Maiu 2022. Foto/Hatutan.com

Alkatiri konsidera loron 20 fulan-Maiu 2022, sai loron ida ne’ebé importante tebes bá vida FRETILIN nian. Tanba hosi ne’e bá oin, mean hamriik metin. Maske iha kampaña sira kanta, mean manán metin.

“Ne’e mak ita hakarak duni, atu mean ho modok, ho kór oioin, atu hamriik hamutuk, no ita hamriik metin nafatin,” Alkatiri hateten.

“Ha’u atu fó de’it benvindu bá kamarada sira hotu, kamarada Lere, biar hanesan jenerál, nia sempre dehan, ha’u FRETILIN. Nia nunka nega. Tanba ne’e, CCF no FRETILIN hanesan ninia uma rasik. Ohin, tuir desizaun, rezolusaun komisaun polítika nasionál (CPN) nian atu halo rekoñesimentu ida ne’e, ba kamarada Lere,” Alkatiri hateten tán.

Bainhira Lere ho karreta tama iha aredór CCF nian, militante kanta hasoru nia, ho liafuan “fila-fali mai”. No Lere rasik lia tun dehan, nia la’ós foin mak fila-fali bá CCF maibé nia ho kamarada maluk sira seluk moris nanis kedan ona iha uma-lulik CCF.

“Ohin, kamarada sira, ha’u ladún toman liafuan kamarada. Ha’u toman irmaun, kampanáriu. Ohin, ha’u tama mai, hanesan mós irmaun Prezidente Lú Olo tama mai, kanta dehan, fila-fali mai. Ami la fila ida, ami moris nanis kedas iha uma-lulik ida ne’e,” Lere Anan Timur afirma.

Lere dehan, ho uma-lulik FRETILIN mak, halai hosi vila ba ai-laran, no hosi ai-laran mai fali vila. Tan ida ne’e mak sira la fila-fali, maibé sira nafatin iha FRETILIN.

Lere konta, kuaze tinan 40 resin, nia la ko’alia kona-bá polítika, liu-liu polítika FRETILIN sira ninian. Maske nune’e, Lere afirma aan nafatin ema FRETILIN. Biar sei tau diviza fitun ida to’o fitun tolu, hodi lidera instituisaun militár mós sempre deklara aan FRETILIN nafatin.

“Ha’u hein para ema ruma atu kritika, maibé hothotu nonook, to’o ha’u sai hosi vida militár,” Lere Anan Timur hateten tán.

Jornalista: Rogério Pereira Cárceres