Hatutan.com, (10 Maiu 2022), Díli- Ministru Transporte no Komunikasaun (MTK), José Agostinho, haruka ona karta pedidu bá Ministru Defeza Filomeno da Paixão de Jesus, atu bele komunika ho Komandu FALINTIL-Forsa Defeza Timor Leste (F-FDTL) koloka F-FDTL nia tripulante iha operasaun ró Berlin-Ramelau.

Lee Mós : MTK Investiga Hela Asidente Ró Berlin-Ramelau

Adjunta Prezidente Autoridade RAEOA, Leonia Monteiro Halo koordenasaun ho APORTIL hodi bá haree diretamente manutensaun ró Berlin-Ramelau, iha ona progresu di’ak, tempu badak hahú fali ona operasaun transporte marítima Dili – Oé-cusse. Foto/Espesiál

Ministru MTK, José Agustinho ba jornalista sira iha Parlamentu Nasionál, Tersa (10/05/2022), konfirma katak MTK iha ona esforsu atu iha solusaun imediata no koordena ona asuntu ne’e ho parte hotu atu bele funsiona hikas operasaun Berlin-Ramelau.

Nia hateten, husik prosesu investigasaun bá insidente  ne’ebé hamosu estragus bá Berlin-Ramelau kontinua la’o maibé la bele prejudika konektividade  transporte marítima Dili-Atauro no Oé-Cusse.

Nia afirma, investigasaun sei lao hela tamba ne’e seidauk hatene fator internu ka externu mak hamosu insidente ne’e ba Berlin-Ramelu to’o naklees bainhira atraka iha Portu Oé-Cusse, fulan hirak liubá.

“Esforsu atu asegura konektividade tenke lais no kona-bá nia kauza at ka kuak, oras ne’e, hadi’a hotu ona no ita iha esforsu atu iha tripulante no koordena ona ho parte Ministériu Defeza atu oinsa mak bele apoia, asegura operasaun Berlin-Ramelau nian,” Ministru José Agustinho hateten.

Relasiona ho operasaun Berlin-Ramelau, governante ne’e esklarese sei hein responta husi parte Ministériu Defeza hodi oferese tripulante F-FDTL atu bele hahú halo operasaun.

Iha parte seluk, Ministru Defeza Filomino da Paixão de Jesus hateten, nia simu ona karta husi Ministru MTK no haruka ona bá iha Komandu F-FDTL atu hola desijaun hodi hatan ba pedidu husi MTK, nune’e bele tulun fasilita komunidade sira RAEO asesu ba transporte marítima.

Nia afirma, desde simu karta pedidu husi parte MTK hahu horisehik no ohin nafatin fó hanoin bá iha Komandu F-FDTL atu haree pilotu ida ho nia ekipa bele ajuda tamba ne’e nafatin hein resposta husi komandu.

Manutesaun Ró Berlin-Ramelau. Foto/Espesiál

“Há’u insista nafatin tamba ne’e Komponente Naval F-FDTL sei halo preparativu sira no há’u garante semana ne’e bele iha posibilidade,” Filomino da Paixão de Jesus hateten.

Iha parte seluk, adjunta Prezidente Autoridade Rejiaun Administrativa Espesial Oé-Cusse Ambeno (RAEOA), Leonia Monteiro hateten, halo ona koordenasaun ho prezidente APORTIL no ba haree direitamente kondisaun  Berlin-Ramelau atu nune’e movimentu transporte marítima entre RAEOA-Díli bele la’o di’ak fila-fali atu nune’e ekonomia iha RAEOA bele lao diak fila fali.

“Há’u mós mai koalia kedas ho Ministru Transporte no Telekomunikasaun no iha ona desizaun atu hahú segunda bá oin Berlin-Ramelau bele halo hikas operasaun atu nune’e movimentasaun ekonomia povu nian bele lao hikas,” Leonia Monteiro hateten.

Parte hotu koordena ona no semana ne’e sei finaliza manutensaun bá  Berlin-Ramelau bele halo hikas operasaun.

Jornalista: Vito Salvador