Hatutan.com (29 Abríl 2022) Díli—Tribunál Rekursu (TR) liu hosi rezultadu verifikasaun ne’ebé hala’o durante loron ida hahú horisehik, deside hodi proklama José Manuel Ramos-Horta sai vensedór hodi eleitu ba Prezidente Repúblika 2022-2027 ho votu 398.028 (62,1%).

Observadór internasionál sira partisipa iha serimónia proklamasaun José Manuel Ramos-Horta sai vensedór hodi eleitu ba Prezidente Repúblika 2022-2027, iha fatin Tribunál Rekursu, Caicoli, Sesta (29/04/2022). Foto/Media CNE.

TR anunsia, hafoin halo verifikasaun no laiha irregularidade ruma ne’ebé akontese iha prosesu apuramentu nasionál CNE.

Lee Mós: TR Valida Eleisaun PR Primeira Volta, Horta ho Lú Olo Hakat ba Segunda Vota

“Durante verifikasaun ne’ebé TR halo ba rezultadu akta apuramentu nasionál CNE ne’ebé haruka mai Bazeia ba lei eleitorál hodi fó kompeténsia ba TR atu verifika no laiha irregularidade. Tanba ne’e, TR deside hodi proklama rezultadu eleisaun segunda volta iha ne’ebé José Ramos Horta mak sai vensedór ba eleisaun Prezidente Repúblika 2022-2027,” Prezidente Tribunál Rekursu (PTR), Deolindo dos Santos hateten ba jornlista sira iha knaar fatin TR, Caicoli, Sesta (29/04/2022).

Prezidente Tribunál Rekursu  espera Prezidente Repúblika eleitu sei sai Prezidente ba Timor Leste (TL) no ba ema hotu, maski kandidatu Francisco Guterres Lú Olo hetan votu 242.239 ekivale ba (37,9 %).

Deolindo mós kongratula servisu STAE no CNE inklui observadór nasionál no internasionál, PNTL no ema hotu-hotu ne’ebé kolabora hodi lori estabilidade durante eleisaun Prezidensiál.

Antes ne’e, rezultadu apuramentu nasionál hosi CNE hatudu katak, kandidatu Prezidente Repúblika (PR), númeru sorteiu 1, José Manuel Ramos Horta kontinua lidera ho totál votu hamutuk 398.028 (62,1%), no kandidatu PR númeru 2, Francisco Guterres Lú Olo ho de’it votu 242.939 (37,9%).

Totál Votu nulu iha apuramentu ne’e, hamutuk rihun-lima (5.000) no konsege halo kontajen, verifikasaun iha votu 1.200 mak sai válidu, hodi aumenta ba kandidatu na’in-rua nia votu mak hanesan Ramos-Horta hetan atus-ualu-resin (800-resin), Lú Olo hetan atus-haat-resin (400-resin).

Enkuantu totál eleitór hamutuk 859.925, ema ne’ebé tuir vota hamutuk 646.389, votu válidu 640.967 (99,16), votu branku 1.643 ( 0,25%), votu nulu 3.734 ( 0,58%) votu rezeitadu 28 (0,00%) no votu abandonadu iha 15.

Jornalista: Carmelita Isaac