Hatutan.com, (26 Abríl 2022), Díli-Parlamentu Nasionál (PN) liu husi plenária ordinária, Tersa (26/04/2022), halo levantamentu imunidade bá membru PN husi Bankada Partidu Demokrátiku (PD), António da Conceição “Kalohan” hodi bá presta deklarasaun iha Tribunál kona-bá kazu projetu prodús masin Atabae.

Membru PN, António da Conceicão “Kalohan”. Foto/Espesiál

Deputadu bankada PD, Antoni da Conceição ‘Kalohan’ ba Jornalista sira, iha resintu PN, Díli, Tersa (26/04/2022), hateten, PN halo ona levantamentu imunidade bá nia relasiona ho kazu ne’ebé Tribunál notifika nu’udár arguidu bá iha kazu produsaun masin Atabae.

Iha akuzasaun ne’ebé Tribunál notifika bá António da Conceição ‘Kalohan’ katak iha kazu ne’e iha relasaun ho partisipasaun ekonómiku.

Nia afirma kazu ida ne’e loos dunik kazu ne’ebé mak dekore loloos ne’e nia la’ós autór prinsipál tamba antes ne’e muda tiha ona bá Ministériu Edukasaun no ezerse tiha ona papél hanesan Ministru Edukasaun.

Nia afirma, planu halo masin Atabae nu’udár mós inisiativa Governu nian para halo dezenvolvimentu indústria iha Timor.

“Ha’u agora tama hanesan arguidu ida tamba ha’u hetan akuzasaun fali husi ha’u nia kolega ministru ne’ebé troka ha’u no dehan ha’u fó bá kompañia ne’e tamba ami partidu ida, mais ministru ne’e mós haluhan tiha katak  nia maka halo kontratu no halo pagamentu. Ha’u simu mak proposal barabarak no seidauk fó kontratu no mós prosesu osan nian,” António “Kalohan” argumenta.

Deputadu hatutan nia kazu ne’e tuan tamba kleur tiha ona no prosesu mak dada to’o hela agora, uluk  mós nia iha kazu ida, maibé hafoin Tribunál rona tiha nia deklarasaun nu’udár arguidu no hein atu rona de’it sasin mak juis sira bá tiha eskola, tamba ne’e, nia parte mós lahatene hein fali to’o bainhira foin mak deside no nia hein katak ida ne’e mós la’ós halo de’it asaun polítika para nia imajen mak mosu de’it iha públiku hanesan “na’ok-teen” boot ida iha Timor, mais hein katak justisa mak sei lao.

“Ha’u agradese tamba kolega deputadu sira intende situasaun ne’ebé maka lao tamba ha’u hala’o hela knar hanesan deputadu tamba ne’e iha loron sira julgamentu ha’u nafatin bá presta deklarasaun, maibé ha’u hala’o nafatin knar nu’udár deputadu, plenária sira ha’u tuir nafatin kuandu justisa dehan tiha ona dehan ha’u bá Becora mak ha’u foin para loloos,” nia dehan.

Autorizasaun no levantamentu imunidade deputadu Antonio da Conceição ‘Kalohan’ ne’e parlamentu nasionál halo liu husi votasaun ne’ebé deputadu hamutuk 49 mak vota afavór, 4 abstain, kontra 4 no nulu 1 enkuantu deputadu 7 seluk auzente.

Prezidente Parlamentu Nasional, Aniceto Longuinhos Guterres Lopes, hafoin halo anúnsiu bá rezultadu aprovasaun bá paresér ne’e hateten, PN sei suspende Deputadu António da Conceição ‘Kalohan’ uainhira tuir audiénsia julgamentu iha Tribunál.

“Husi rezultadu ne’e, meza sei suspende mandatu deputadu Antonio da Conceição ‘Kalohan’ iha loron ne’ebé nia tuir audiénsia julgamentu,” Aniceto Longuinhos Guterres Lopes hateten.

Jornalista: Vito Salvador