Hatutan.com, (26 Abríl 2022), Díli—Primeiru-Ministru (PM) Taur Matan Ruak, hamutuk ho Vise-Ministru Agrikultura no Peska, Abílio Xavier de Araújo inklui Sekretáriu Estadu Ambiente (SEA), Demétrio do Amaral de Carvalho, diskute ona programa rehabilitasaun kafé ba tinan ida ne’e.

Primeiru-Ministru (PM) Taur Matan Ruak, hamutuk ho Vise-Ministru Agrikultura no Peska, Abílio Xavier de Araújo inklui Sekretáriu Estadu Ambiente (SEA), Demétrio do Amaral de Carvalho, diskute programa rehabilitasaun kafé ba tinan 2022. Foto/GPM

Iha diskusaun ne’e haree liu kona-bá definisaun no programa ba orsamentu ne’ebé sei hatama iha retifikativu espesialmente iha relasaun área serbisu agrikultura no ambiente ninian, iha área ne’ebé Governu presiza hadi’a.

Lee Mós: KM Halo Alterasaun Dahuluk ba Lei OJE 2022

“Ita hotu hatene kafé hanesan komuniti ida ne’ebé tinan naruk hanesan cash crop ba Timor-Leste ne’ebé hatama osan millaun $27  entermus de importasaun ninian ne’ebé produsaun kafé nian tún tebetebes, populasaun ne’ebé serbisu iha kafé mós boot tebetebes 27,5%  hosi uma-ka’in sira Timor serbisu depende ba kafé. Ne’e signifika, ema rihun atus tolu resin mak defende nia vida iha kafé. Entaun se rendimentu ne’e rasik ba kafé ladi’ak, sira bele hola parte boot iha liña pobreza ninian,” Demétrio Amaral hateten ba Jornalista sira iha Rezidénsia Ofisiál PM Faról.

Toos-na’in kafé ohin loron, tinan ida hetan $160 resin to’o $200 resin iha tinan ida nia laran, nune’e iha loos liña pobreza nian okos, tanba  ne’e Governu tenke halo intervensaun estraordináriu ida iha kafé.

Iha fatin hanesan Vise-Ministru Agrikultura no Peskas, Abílio Xavier de Araújo hateten, iha enkonrtu haree asuntu importante balun no atu haree hikas ba kotuk buat ne’ebé vida agrikultór hasoru, haree populasaun moris iha ekonomia ida ne’ebé mak lentu.

Tanba ne’e, ohin aprezenta mós estratéjiku balun ne’ebé mak bele halo mudansa oitoan iha  preparasaun orsamentu retifikativu ninian, nune’e haree sekunda tán meius balun iha agrikultura liuliu kafé atu ajuda inan sira nia ekonomia iha moris loron-loron.

Asaun ne’ebé sei halo ba planta kafé nian, tarjetu 20% ba área kafé iha Timor kuaze ektare rihun 11 rehabilitasaun kafé, segundu valorizasaun ba ai sira ne’ebé moris iha asosiadu ho kafé hanesan ai samatuku no ai kakeu sira, rua ne’e hamutuk nia kustu bele to’o millaun $6.

Jornalista: Rogério Pereira Cárceres