Hatutan.com, (05 Abríl 2022), Díli—Tribunál Distritál Díli (TDD), Tersa (05/04/2022), kontinua hala’o julgamentu ba krime omisídiu agravadu, ne’ebé deskonfia involve arguidu na’in-18, tanba oho no so’e  vítima Hendrique Soares iha aredór Universidade da Paz (UNPAZ).

Notísia iha Relasaun: Kazu Omesídiu UNPAZ, Guarda Laiha Koñesimentu Kona-bá Matebian

Tribunál Distritál Dili.

Arguidu na’in-18 ho inisiál mak FP, FT, DC, FC, QB, SP, JL, AV LS, JS, SdS, DP, LdS, ZC, GP NI, JC no ida tan.

Iha julgamentu kontinuasaun ne’e, arguidu SP deklara nia laiha koñesimentu se maka oho vítima Henrigue Soares, tanba momentu ne’ebá nia iha hela nia uma, maske antes ne’e nia mós ba partisipa iha soe hamutuk osan iha JS nia uma, maibé iha tuku 22:00 Otl, nia  fila ona ba uma no iha dadersan maka nia foin rona vítima mate tanba monu husi andár leten.

“Ha’u ho vítima dezde uluk ransu-malu di’ak, tanba ne’e  ha’u laiha problema ho vítima,” arguidu SP hateten iha audiénsia.

Hafoin rona arguidu, Tribunál adia hikas julgamentu ba loron seluk hodi kontinua rona arguidu sira seluk.

Ministériu Públiku (MP) akuza arguidu sira ba prátika krime omisídiu agravadu ne’ebé previstu iha artigu 139 hosi kódigu penál TL, relasiona ho kazu omisídiu ne’ebé akontese iha UNPAZ iha loron 20 fulan-Juñu 2021, ne’ebé hamate ona Hendrique Soares.

Audiénsia julgamentu iha Segunda 07 Marsu tinan ne’e, prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac