Hatutan.com, (05 Abríl 2022), Díli-Bankada CNRT iha Parlamentu Nasionál (PN) rekomenda ba Governu, liuliu Ministériu Transporte no Komunikasaun (MTK) atu bele aselera manutensaun ba ró Nakroma ne’ebé avaria no para de’it iha Portu Díli.

Notísia iha Relasaun: CAC Kontinua Buka-Tuir Irregularidade Hosi Kazu Ró Tranship II

Ró Nakroma. Foto/Espesiál

Liu husi intervensaun iha plenária PN, Tersa (05/04/2022), membru Bankada CNRT, Domingos de Carvalho, hateten ró Berlin Nakroma ne’ebé hetan problema tékniku bainhira atu atraka iha Portu Oé-Cusse. Nune’e, Governu tenke aselera nia manutensaun atu bele hala’o operasaun normal hodi fasilita povu Oé-Cusse ho Ataúro nia viajen mai Dili no Dili ba Ataúro ho Oé-Cusse.

“Favor ida, atu husu ba señór sekretáriu estadu ou señór ministru rasik iha ne’e, bele akompaña, no haree halo manutensaun ba ró Nakroma, para hodi lalais bá halo manutensaun,” deputadu Domingos de Carvalho dehan tán.

Deputadu hosi bankada CNRT ne’e mós husu Governu atu tau ema ne’ebé iha kapasidade, hodi bele jere ró Nakroma  tanba tinan 20 ona, TL foin mak hetan ró di’ak ida, no tanba ne’e, tenke tau matan ba róne’e.

“Ha’u lamenta tebetebes, kuandu ha’u ko’alia buat di’ak ida, deputada Olinda ne’e, sempre dehan reasaun maka’as hodi hasoru ha’u ne’e. Ha’u ko’alia ne’e, kolega deputadu sira hotu, observa katak, ha’u ko’alia buat loos. Kuidadu ita ninia ró Nakroma, la’ós ministru husi KHUNTO ne’e nia ró  no la’ós mós CNRT ró ka FRETILIN nia ró, mais Timor tomak ninia ró ne’ebé presiza tau matan no halo manutensaun,” deputadu Domingos kestiona.

Iha biban ne’e, membru PN husi Bankada  Kmanek Haburas Unidade Nasionál Timoroan (KHUNTO), Olinda Guterres, halo kedas reaje hodi husu Deputadu sira atu evita temi Ministru  José Agostinho nia naran relasiona ho ró Nakroma ne’ebé avaria hela.

“Horiseik tán fali dehan katak, ró ne’e la di’ak. Ró ninia odamatan la di’ak, dehan kapitaun ró ne’e mak lori roo lahatene. Entaun, ida ne’e mak horiseik ha’u hatete,  señór deputadu, sé ró ne’e ema lori lahatene karik ne’e, ita-boot bele husik ita-boot ninia fatin, bele ba lori fali ró, bele ka lae? Tanba durante ne’e, ha’u haree katak, ró ne’e seidauk sofre buat ruma iha tasi-laran. Ita-boot ne’e hirus saida ba Ministru José Agostinho, la kleur ró, lakleur ró,” deputada Olinda Guterres hateten.

Deputada KHUNTO ne’e afirma, ró ne’ebé iha ne’e, la’ós deputadu ida nian, la’ós ninian (Olinda), maibé, povu Timor-Leste tomak nian. Sé ró ne’e nia odamatan aat, tenke halo xamada ba ministru, atu bele ba hatán no halo esplikasaun klaru, kona-bá tanba saida mak la hadi’a róne’e ninia odamatan.

“Agora, ita boot dehan troka fali ema lori ró ne’e. Ema lori ró ne’e seidauk soke buat ida, lori ba soke ita-boot ninia uma, ne’e oin seluk. Ida-ne’e la’o iha tasi laran ne’ebá, ita-boot konta satiadu loos ne’e, tanba saida? Ita-boot inimigu ba ha’u ne’e tanba saida?,” Olinda dos Santos hateten no emosaun.

To’o oras ne’e mós, deputada Olinda sente laran sei ‘kanek’, tanba iha 2021, bainhira diskusaun namanas iha plenária, deputadu Domingos de Carvalho, duun nia no Ministru José Agostinho da Silva, halo korrupsaun iha pagamentu osan ba Ró Tranship II, ne’ebé aluga hosi Indonézia.

Hatán be kestaun ne’e, Ministru Internu Asuntu Parlamentár no Komunikasaun Sosiál (MAPKOMS), Merício Juvinál dos Reis “Akara” hateten, nia parte sei enkamiña direta preokupasaun deputadu sira nian ba Ministru José Agostinho, hodi bele halo esplikasaun kle’an liután.

“Ha’u hanoin, problema ró, ha’u la presiza hato’o tán, tanba señór ministru mós iha ne’e hela, parese rejistu tiha ona, no tempu ruma, ita-boot sira konvida señór ministru mai, no nia mak sei esplika direta,” MAPKOMS) interinu no atuál Sekretáriu Estadu Komunikasaun Sosiál (SEKOMS), Meríçio Juvinál dos Reis “Akara” hateten iha plenária PN.

Jornalista: Rogério Pereira Cárceres