Hatutan.com, (31 Marsu 2022), Díli—Primeiru Ministru (PM) Taur Matan Ruak husu ona lisensa atu akompaña kandidatu Prezidente Repúblika períudu 2022-2027 ho númeru sorteiru 2 Farncisco Guterres Lu Olo ba kampaña durante semana rua, nune’e fó kompeténsia ba Vise Primeira Ministra no Ministra Solidariedade Sosiál no Inkluzaun, Armanda Berta dos Santos hodi lidera interinamente VIII Governu Konstitusionál.

“Ha’u mai hasoru Primeiru Ministru liga ho férias ne’ebé Xefe Governu foti atu partisipa direta iha kampaña. Tamba ne’e mak ha’u mai hasoru hodi simu orientasaun servisu hodi assume mós knaar nu’udár Primeira Ministra interina,” Armanda Berta dos Santos hateten iha rezidénsia ofisiál Primeiru Ministru Farál, Kinta (31/03/2022).

Notisia iha Relasaun:Sorteiu Eleisaun Segunda Volta, Horta Númeru 1 no Lú Olo 2

Durante semana rua Armanda Berta sei haree liu ba servisu ne’ebé Xefe Governu nian tuir orientasaun  Primeiru Ministru rasik.

Tuir planu, Taur Matan Ruak sei hahú férias iha loron 02 to’o loron 21 fulan Abríl, nune’e Armanda Berta dos Santos kompromete sei garante funsionamentu órgaun Governu nian ho di’ak.

Jornalista: Vito Salvadór