Hatutan.com, (31 Marsu 2022), Díli—Prezidente Repúblika (PR), Francisco Guterres “Lú Olo”, iha Kinta 31 marsu, fó posse ba membru VIII Governu Konstitusionál RDTL na’in-rua mak hanesan Sekretária Estadu Igualidade no Inkluzaun (SEII), Maria do Rosário Fátima Correia, no Sekretáriu Estadu Terras no Propriedade (SETP), Eldino Rodriguês dos Santos, iha Palásiu Prezidente Nicolau Lobato, Bairu-Pite Díli.

Sekretária Estadu Igualidade no Inkluzaun (SEII), Maria do Rosário Fátima Correia ho Sekretáriu Estadu Terras no Propriedade (SETP), Eldino Rodriguês dos Santos foto hamutuk ho Líder Másimu órgaun soberania haat, hafoin simu pose iha Palásiu Prezidente, Dili, Kinta (31/03/2022). Foto/Média PR.

Membru Governu foun na’in-rua ne’e, sei kontinua de’it programa sira anteriór nian no lakohi promete tanba mandate Governu ida ne’e nian hela de’it ona tinan ida.

Notisia iha Relasaun:Taur Kompleta Ona Síklu Remodelasaun Governativa

Maski nune’e, Sekretária Estadu Igualidade no Inkluzaun (SEII), Maria do Rosário Fátima Correia, agradese ba kbi’it hosi Maromak, tanba fó oportunidade atu hala’o kna’ar ne’ebé mak hetan fiar hosi Primeiru Ministru (PM), Taur Matan Ruak hodi bele lidera instituisaun ne’e to’o 2023.

“Ha’u la mai ho programa, hahú hosi 2020 to’o agora altura ne’ebá iha GAPI, depois to’o iha SEII, no ha’u kontinua hodi hametin programa ne’ebé mak iha ona. Karik, programa estratéjiku seidauk iha, ha’u espera katak ha’u sei ba haree, depois karik bele aumenta tán,” Maria do Rosário Fátima Correia hateten, hafoin simu posse.

Nia sei kontinua ho programa ne’ebé antes ne’e iha ona hanesan hakbi’it feto oinsá atu asesu feto ba justisa, oinsá mós feto sira atu hetan oportunidade iha vida politika, sosiál, ekonómika, edukasaun no saúde.

Kona-bá atu hamenus problema violénsia hasoru feto no labarik feto sira, Sekretária Estadu foun ne’e afirma, Governu iha ona planu asaun nasionál ba kontra violénsia doméstika, oinsá mak atu bele reforsa fali rede referál sira ne’ebé uluk eziste ona no sei kontinua de’it.

Rede referál ne’e kompostu hosi ministériu relevante inklui sosiedade sivíl, maibé servisu ladún la’o ho efetivu, kauza hosi pandemia Covid-19 ho impasse politika iha rai-laran.

“Entaun, oinsá ha’u nia papél ida agora mai mós atu efetiva fila-fali rede referál sira ne’ebé mak iha territória tomak,” nia promete.

Antes ne’e, Sekretária Estadu Igualidade no Inkluzaun (SEII) sesante Maria da Fonseca Monteiro, estabelese ona sentru rede referrál iha munisipiu ho objetivu integra programa hirak ne’ebé mak iha tiha ona.

Liu hosi sentru refere atu parte legál ne’ebé destaka iha munisipiu bele fó asisténsia legál ba vitima bainhira hasoru violénsia domestika, iha nivel suku ho aldeia sira, atu bele ajuda relata sira nia kazu nune’e bele hetan prosesu formál.

Nune’e mós Sekretáriu Estadu Terras no Propriedade (SETP), Eldino Rodriguês dos Santos, espresa sentimentu orgullu tanba VIII Kosnstitusionál fó konfiansa ba nia, atu ba assume hikas responsábilidade hanesan SETP, Maibé laiha tán programa foun, no sei kontinua de’it programa ne’ebé antes ne’e iha ona.

“Ha’u nia vizaun atu ba kontinua de’it sekretáriu sesante ninia servisu, ne’ebé mak halo tiha ona, no kontinua halo buat sira ne’ebé mak karik seidauk halo,” Eldino Rodriguês dos Santos hateten.

Eldino iha hanoin atu halo mós planu no programa foun, maibé la biban, tanba nia hatene katak mandatu ne’e ba tinan ida de’it.

“Tanba ne’e mak ita dehan, ita atu iha planu foun ruma, mais karik tanba tinan ida de’it ne’e ita la biban. Tanba ne’e mak kontinua de’it servisu sira ne’ebé durante ne’e iha hela, ita ba kompleta de’it,” Eldino Rodriguês hateten.

Kona-bá solusaun ba rai sira ne’ebé akontese disputa, Sekretáriu Estadu Eldino Rodriguês dehan, servisu lai mak haree.

“Ita ba servisu lai mak ita haree, liu-liu ba problema boot iha rai iha munisipiu Dili, ne’e problema ne’ebé mak komplikadu tebes, maibé ida ne’e,” Eldino, subliña.

Hatán kona-bá populasaun barak durante ne’e mós okupa rai Estadu, Eldino hateten, ema hotu-hotu moris iha rai nia leten, Estadu ho povu ida de’it tanba ne’e ema hotu tenke kolabora ho Estadu.

“Depois ita sei koalia. Buat ida ita promete ne’e, buat saida oitoan. Depois ita servisu mak ita sei haree,” Eldino lakohi promete.

Iha diskursu, Primeiru Ministru Taur Matan Ruak husu ba membru Governu foun nain-rua ne’ebé foin simu posse atu assume dezafiu foun ne’e ho responsábilidade no dinamizmu, ho objetivu atu garante igualidade no oportunidade ba sidadaun hotu, seguransa juríika negósiu no investimentu ho kompromísiu transforma TL ba País ne’ebé riku, Forte no Seguru bebeik.

“Ami termina ona, intervensaun ida ne’e hodi hato’o ba ita-boot na’in-rua ne’ebé simu ona pose, ami nia felisitasaun bo’ot liu-liu ami nia enkorajamentu, tanba ita-boot nain-rua nia misaun foun sei ezije imi-nian servisu maka’as ho dedikasaun no empeñu tomak,” PM Taur enkoraza.

VIII Governu Konstitusionál forma iha 22 Juñu 2018 no mandatu sei remata iha 22 fulan Juñu 2023 hodi kompleta tinan lima. 

Notisia iha Relasaun:Remodelasaun Atu Halo Buat Barak no Di’ak Liu Tán

Jornalista: Carmelita Isaac