Hatutan.com, (29 Marsu 2022), Díli- Hafoin Tribunál Rekursu  (TR) simu rezultadu apuramentu nasional husi Comissão Nasional das Eleições (CNE) no halo análize ba dokumentu hotu ne’ebé iha juiz koletiva sira la hetan irregularidade ruma ne’ebé fó influensia ba rezultadu apuramentu nasionál. Nune’e,  Tersa loraik (29/03/2022), ofisialmente TR valida rezultadu eleisaun primeira volta ne’ebé hala’o ona iha loron 19 fulan-Marsu 2022.

Notísia iha Relasaun: Laiha Reklamasaun husi Kandidatu PR sira, CNE Entrega Rezultadu Apuramentu ba TR

Prezidente Ribunál Rekursu (PTR), Deolindo dos Santos valida rezultadu eleisaun ba Prezndente Repúblika primeira volta. Dili, 29 fulan-Marsu 2022. Foto/Hatutan.com

Bazeia ba artigu 48 husi lai nú. 7/2006 juiz koletivu Tribunál Rekursu sira ne’ebé halo verifikasaun ba rezultadu apuramentu nasionál husi CNE kompostu husi Deolindo dos Santos, Jacinta Correia da Costa no Duarte Tilman.

Hafoin simu rezultadu apuramentu nasional ne’e,  TR mós halo verifikasaun bazeia ba total votante sira ne’ebé partisipa iha eleisaun prezidensiál, eleisaun prezidensiál, 19 fulan-Marsu 2022 ho total eleitór inskritu 856.613, eleitór votante  664.106, votu validu 651.859 (98,16%), votu branku 3.743 (0,56%), votu nulu 8.386 (1,26%), votu rejeitadu 65 (0,01%).

Prezidente Tribunal Rekursu, Deolindo dos Santos liu husi anúnsiu rezultadu iha TR, Caicoli, Tersa (29/03/2022), hateten, husi total votante sira ne’ebé ezerse sira-nia direitu votu iha loron 19 fulan-Marsu liubá hatudu kandidatu rua ne’ebé hetan votu barak liu husi  votante sira mak sei hakat ba eleisaun segunda volta tanba laiha ida mak atinje metade husi total votu válidu ne’ebé iha ou seja 50%+1.

“Tuir artigu 76 konstituisaun RDTL númeru 3 no 4 no artigu 11 no nú.2 no 3 husi lei 7/2006, 28 Dezembru, kandidatu rua ne’ebé hetan votu barak liu sei ba konkorre iha eleisaun segundu volta mak José Manuel  Ramos-Horta no Francisco Guterres Lú Olo,” Deolindo dos Santos hateten.

Atribuisaun votu válidu ba kada kandidatu tuir verifikasaun no validasaun ikus husi TR ne’ebé Hatutan.com sita mak hanesan tuir mai:

1. Okupa hosi Kandidatu José Ramos Horta ho númeru sorteiu 14, hetan votu 303.477 ho (46,6%).
2. Kandidatu Francisco Guterres Lú Olo ho númeru sorteiru 6, hetan votu 144.282 (22,1%).
3. Kandidata Armanda Berta dos Santos ho númeru sorteiu 9 hetan votu 56.690 (8,7%).
4. Lere Anan Timur ho númeru sorteiu 8, hetan votu 49.314 (7,6%).
5. Mariano Assanami Sabino ho númeru sorteiu 4, hetan votu 47.334 (7,3%).
6. Ancleto Ferreira Bento ho númeru sorteiu 5, hetan votu 13.205 (2,0%).
7. Martinho Germano da Silva Gusmão ho númeru sorteiu 13, hetan votu 8.598 (1,3%).
8. Hermes da Rosa Correia Barros ho númeru sorteiu 2, hetan votu 8.030 (1,2%).
9. Milena Pires ho númeru sorteiu 7, hetan votu 5.430 (0,8%).
10. Isabel da Costa Ferreira ho númeru sorteiu 1, hetan votu 4.219  (0,6%).
11. Felizberto Araújo Duarte ho númeru sorteiu 15, hetan votu 2.709 (0,4%).
12. Constâncio Pinto ho númeru sorteiu 11, hetan votu 2.520 (0,4%).
13. Rogério Tiago de Fatima Lobato ho númeru sorteiu 4, hetan votu 2.058 (0,3%).
14. Virgílio Guterres ho númeru sorteiu 12, hetan votu 1.720 (0,3%).
15. Antero Bendito da Silva ho númeru sorteiu 10, hetan votu 1.562 (0,2%).
16. Ángela Freitas ho númeru sorteiu 3 hetan votu 711 (0,1%).

Jornalista: Vito Salvador