Hatutan.com, (23 Marsu 2022), Díli- Observadór sira husi Organizasaun intergovermental g7+ apresia ho prosesu eleisaun prezidensiál iha Timor-Leste ne’ebé la’o ho susesu tanba kontribuisaun sidadaun sira hodi garante estabilidade no kontribui ba pás.

Notísia iha Relasaun: Governu Atribui Millaun $1 ba g7+ Atu Finansia Despeza Globál-Nasionál

Logotipu g7+

g7+ hanesan organizasaun intergovermental ne’ebé ho nia misaun tulun nasaun sira afeta ba konflitu no frajilidade hodi halo advokasia ba harii pás no harii Estadu hanesan xave ba dezenvolvimentu ne’ebé sustentável. Knaar g7+ seluk mak jere rekursu naturál, organiza eleisaun no garante asesu ba justisa no rekonsiliasaun.

“Situasaun jerál ne’ebé la’o hatudu eleisaun prezidensiál ne’e la’o ho di’ak, iha trankuilidade, pás no laiha intimidasaun polítiku. Ami sente katak ida-ne’e núdar orgullu ida tanba maioria votante sira iha maturidade polítika no iha toleransia polítika entre sidadaun sira,” observadór internasional g7+ nian husi  Sierra Leoa, Larry Fangawa ba jornalista sira iha sede g7+, Palaçio do Governu, Kuarta (23/03/2022).

g7+ mós nota partisipasaun feto iha eleisaun prezidensiál másimu no iha progresu no tuir g7+ nia observasaun hatudu katak aautoridade seguransa sira mós hala’o servisu ho di’ak hodi asegura atu eleisaun ne’e la’o ho susesu.

Larry Fangawa mós apresia ho servisu órgaun eleitorál sira, hanesan STAE no CNE hamutuk ho autoridade kompetente hodi asegura direitu ema ho defisiente iha eleisaun prezidensiál.

“Ami hare katak votante sira ne’ebé ho nesesidade espesiál hanesan ema ho defisiente, ferik katuas no inan isin-rua sira sempre hetan asisténsia atu asegura sira-nia direitu ba vota,” Larry Fangawa haktuir.

g7+ mos rekomenda atu Governu prolonga tempu ba votasaun no modifika prosedimentu iha kontajen atu bele hasae tasa partisipasaun povu nian. Presiza haforsa edukasaun votante ba eleitór sira liuliu ba foin-sa’e sira ne’ebé foin ba dahuluk atu vota. g7+ mos kongratula no apresia parte hotu ne’ebé kontribui ba susesu eleisaun ne’e nian.

Ekipa g7+ ne’ebé halo observasaun ba eleisaun prezidensiál 2022 kompostu husi observadór internasional na’in-rua husi nasaun Sierra Leoa no Afeganistaun inklui ho observadór nasionál hamutuk na’in-ualu (8) ne’ebé kobre munisípiu haat  (4) hanesan Ermera, Bobonaro, Díli no Ermera.

Jornalista: Vito Salvador