Hatutan.com, (21 Marsu 2022), Díli—Polísia Nasionál Timor-Leste (PNTL), liuhosi Komandu Munisípiu Díli, detein ona autór hamutuk na’in 21 iha sela detensaun Munisípiu Díli, tanba halo disturbiu iha Sentru Votasaun Escola Bázika Sentrál Fomento 02, Postu Administrativu Comoro, Díli.

Portavós Komandu Jerál PNTL, Superintendente Xefe Polísia, Armando Monteiro. Foto/Hatutan.com.

Tuir kronolojia, iha Domingu 20 Marsu 2022, maizumenus tuku 03:00 liu, oras madrugada, mosu grupu deskoñesidu kompostu hosi ema hamutuk na’in 21, tama ba sentru votasaun laran, hodi baku no hakanek apoiante ida hosi kandidatu Prezidente Repúbliak balun, ne’ebé akompaña hela prosesu kontánjen iha sentru votasaun ne’e.

Notisia iha Relasaun:HAK Husu Kandidatu Sira Hato’o Mensajen Dame Molok Eleisaun

Ho akontesimentu ne’e, membru PNTL na’in-tolu ne’ebé asegura sentru votasaun iha EBC Fomentu 02, komunika kedan ba forsa rezerva hodi halo kapturasaun ba suspeitu sira.

“Haree ba karaterístika hosi ita nia komunidade ne’ebé mak tenta atu halo perturbánsia ba ita nia kontájen ida-ne’e, entaun ita nia seguransa sira iha ne’ebá, komunika diretamente hodi hola medida no kaptura kedan autór ne’ebé mak tenta halo impedimentu ba krime eleitóral ida-ne’e. Suspeitu 21 iha ona sela detensaun,” Portavós Komandu Jerál PNTL, Superintendente Xefe Polísia, Armando Monteiro hateten ba jornalista sira iha Kuartél Jerál PNTL, Caicoli, Segunda (21/03/2022).

Evidénsia maka, PNTL halo ona apreensaun ba motorizada ida, karreta tolu ne’ebé utiliza hosi suspeitu sira hodi halo ofensa integridade fízika simples, danu agravadu no krime eleitóral sira seluk hanesan perturbánsia iha krime eleitorál.

Kona-bá naran inisiál hosi suspeitu sira ne’e, Komandante Armando seidauk identifika hotu, tanba sei iha prosesu investigasaun nia laran.

Maibé, bainhira konklui investigasaun PNTL sei aprezenta kazu ne’e ba Ministériu Públiku (MP) hodi kontinua prosesu.

“Kazu ida ne’ebé mak komandu PNTL rejistu ne’e, iha perturbasaun aktu eleitorál no dokumentu ba identifikasaun hale’u, lori identidade ema seluk ninian, tenta obriga fiskais no brigada ba sentru votasaun inklui ita nia seguransa. Ida-ne’e mak akontese iha fatin tolu iha Díli, tantu akompaña mós dano, nomós ofensas,” nia hateten.

Tuir dadus, durante prosesu Eleisaun Prezidensiál iha 19 Marsu 2022, Komandu Jerál PNTL rejistu kazu asidente tráfegu hamutuk 50 no insidente 52.

Hosi asidente tráfegu, iha sidadaun hamutuk na’in-tolu mak lakon vida, durante iha periudu eleisaun nia laran no seluk sai vítima durante semana ida nia laran.

Kona-bá kazu insidente 52 ne’e, iha kazu espesífiku lima mak ligadu ho krime eleitorál. Ida, akontese iha área Caisidiu, Suku Bahú Baucau. Ida iha Sentru Votasaun Paralelu Instutitu Nasionál ba Administrasaun Públika (INAP), Comoro, EBC Fomentu 02, Manleuana no Becora.

“Hosi kazu espesifiku ne’ebé mak Komandu PNTL rejistu, hotu-hotu iha prosesu investigasaun nia laran, ita koordena no halo komunikasaun ho Ministériu Públiku, espera oras ida finaliza no sei aprezenta. Ita mós detein suspeitu iha sela detensaun, iha Baucau na’in-tolu no iha Dili hamutuk 25. Fomentu suspeitu hamutuk 21 pesoas, iha Becora ida no Manleuana na’in-tolu,” Komandante Armando hateten tán.

Komandu Jerál PNTL mós agradese kontribuisaun sira hosi povu TL tomak, inklui fiskais partidu sira, observadór nasionál no internasionál, brigada STAE nian, ekipa susesu kandidatura PR 16 nian, nomós média sira hotu ne’ebé mak kontribui ba prosesu eleisaun ne’e la’o iha estabilidade seguransa iha territóriu Timor laran tomak, la’o iha ámbitu kalma no hakmatek.

Jornalista: Rogério Pereira Cárceres