Hatutan.com, (21 Marsu 2022), Dili–Conselho de Imprensa de Timor-Leste (CI) serbisu hamutuk ho Ajénsia Internasionál Programa Nasoins Unidas ba Dezenvolvimentu (PNUD/UNDP) fasilita jornalista sira liuhusi programa “Media Bus-Tour” ba kobertura atividade eleisaun parlamentár.

Notísia iha Relasaun: CI-UNDP Prodús Matadalan Reportájen Sensível ba Jéneru

Jornalista sira halo entrevista ho komunidade husi Munisípiu Aileu iha “Media Bus-Tour” ne’ebé fasilita husi CI ho PNUD/UNDP. Foto/CI

Informasaun ne’ebé Hatutan.com sita husi pájina Facebook ofisiál Conselho de Imprensa de Timor-Leste, Segunda (21/03/2022), relata katak  programa “Media Bus-Tour” ne’e fasilita jornalista sira ba halo kobertura iha munisípiu neen(6)  maka hanesan, Manatuto, Baucau, Aileu, Ainaro, Liquiça no Bobonaro.

Joranlista sira husi mídia nasionál fahe ba grupu tolu, kompostu husi grupu primeiru, halo kobertura iha Manatuto (Laleia) no Baucau (Venilale), grupu segundu, kobertura iha Aileu no Ainaro (Maubisse), Liquiça (Loes) no Bobonaro (Balibo).

Atividade “Mídia Bus-Tour” nu’udar meiu ida ne’ebé CI ho UNDP fornese ba jornalista sira hodi bele halo kobertura iha atividade eleisaun prezidensiál ne’ebé realiza iha loron 19 fulan-Marsu 2022.

Media Bus-Tour ne’e realiza tanba serbisu hamutuk  Conselho de Imprensa de Timor-Leste ho Ajénsia Internasionál Programa Nasoins Unidas ba Dezenvolvimentu (PNUD/UNDP) liuhusi Projetu Core TL no hetan apoiu husi Governu Japaun.

Mídia sira ne’ebé partisipa iha atividade “Media Bus-Tour” maka hanesan RTTL, E.P, Ajénsia Notisioza TATOLI.I.P, STL, Hatutan.com, Jornál Independente, Dili Post, GMN, Rádiu Liberdade, Lafaek News, Neon Metin, Loluwari.com, Rakambia, Timor Post, Naunil Mídia, Radio Voz, The Oekusi Post, Bussines Timor no Gardamor.

Notísia iha Relasaun: Matadalan Reportajen Eleitorál ba Jornalista no Meiu Komunikasaun Sosiál Sira

 Jornalista: Elio dos Santos Costa