Hatutan.com, (14 Marsu 2022), Díli-Kandidatu Prezidente Repúblika ho númeru sorteiu 14, José Manuel Ramos Horta, Tersa aban (15/03/2022), termina nia kampaña  iha Tasi Tolu, Dili. Nune’e, Partidu Congresso Nasional de Reconstrução de Timor (CNRT)  ne’ebé Kandidata Ramos Horta ne’e, husu ba apoiante, militante no simpatizante hotu iha Dili laran atu partisipa ho disiplina, respeita órden públiku no Evita provokasaun hodi hamosu violensia.

Notísia iha Relasaun: PNTL Garante Seguransa Kampaña ElPrez Loron Ikus Iha Dili

Sekretariu Jerál partidu CNRT, Francisco Kalbuadi Lay, prezide konférensia imprensa iha Sede Nasionál partidu CNRT, Dili, 14 Marsu 2022. Foto/Hatutan.com

Liuhusi konférensia imprensa ne’ebé hala’o iha Sede Nasionál partidu CNRT iha Baírru Grillos, Dili, Sekretariu Jerál partidu CNRT, Francisco Kalbuadi Lay,  apela ba apoiante, militante no simpatizante hotu atu partisipa iha kampaña ikus kandidatu PR José Ramos Horta nian iha Tasi Tolu ho disiplina no respeita regra no lei sira ne’ebé vigora.

 “Ita tenke kumpri lei, hadomi-malu no hadomi ema hotu-hotu,”  Sekrétariu Jerál partidu CNRT, Francisco Kalbuadi Lay afirma tán.

Nia husu mós ba ilitante no apoiante sira tenke mantein disiplina hodi respeita sinais tranzitu, liliu ba utilizasaun estrada públiku sira hodi respeita sidadaun seluk nia liberdade atu bele garante pás, domin no unidade nasionál iha festa demokrasia ne’e.

Francisco Kalbuadi Lay adianta katak mobilizasaun no partisipasaun massa kamapaña kandidatu PR José Ramos Horta nian iha Tasi Tolu sei boot, maibé nia parte garante siguransa tanba iha ona koordenasaun ho estrutura partidu CNRT Munisípiu Díli hodi koloka militante no apoiante sira ho dia’k atu garante komísiu ne’e la’o ho di’ak no susesu ho objetivu ida ba Timor Leste nia futuru.

“Ami garante siguransa tamba CNRT uluk kedas sempre kaer ba prinsípiu no hakru’uk ba lei  no KOnstituisaun hodi garante estabilidade nasionál,” hateten nia.

Tuir órariu komísiu publiku kandidatu PR partidu CNRT  nian, José Ramos Horta iha Díli sei halao iha loron 15 Marsu 2022 no sei hahu iha tuku  08:30 to’o tuku 17:00 no sei halibur militante no apoiante kuaze ribun ba rihun.

Jornalista: Vito Salvador