Hatutan.com, (07 Marsu 2022), Dili-Polísia Nasionál Timor-Leste (PNTL) rejista vítima na’in-16 iha konfrontu entre apoiante sira ba kandidatu prezidente repúblika nian iha àmbitu kampaña eleisaun prezidensiál 2022-2027.

Notísia ih Relasaun: CNE Keixa Ona ba Polísia Kona-bá Insidente iha Kampaña

Portavós Komandu Jerál PNTL, Superintendente Xefe Armando Monteiro

Tuir relatóriu Komandu Jerál PNTL nian, katak konfrontu entre apoiante kandidatu PR sira-ne’e akontese dezde loron 04 to’o loron 05 Marsu 2022.

Konfrontu tuda-malu hahú uluk husi Suku Makadiki, Postu Administrativu Uatulari, Munisípiu Viqueque, iha loron 04 Marsu ne’e, bainhira apoiante sira hosi kandidatura Prezidente Repúblika, José Manuel Ramos Horta ho Armanda Berta dos Santos nian, fila hosi fatin kampaña ba iha ida-idak nia rezidénsia, no ikus mai, mosu agresaun fizika, ba malu iha dalan klaran, área Makadiki.

Hosi akontesimentu ne’e, PNTL Munisiípiu Viqueque, konsege detein suspeitu nain-tolu, hodi submete  ba investigasaun.   

“Iha Viqueque, kazu ida-ne’e, prosesu la’o tiha ona, ita detein, no prosesu ona autór ida ne’ebé mak deskonfia envolve iha impedimentu ba krime eleitóral ida ne’e, submete ona ba prosesu investigasaun. Identifika ema na’in-tolu,” portavós Komandu Jerál PNTL, Superintendente Xefe Armando Monteiro, informa  ba jornalista sira iha Kuartel Jerál PNTL, Caicoli, Dili, Segunda (07/03/2022).

Iha fali loron 06 Marsu ne’e, akontese mós konfrontu entre simpatizante  partidu FRETILIN ho KHUNTO  bainhira partisipa hela iha atividade kampaña eleitorál, ba Prezidente Repúblika (PR) iha Munisípiu Baucau.

Hosi akontesimentu ne’e, PNTL Baucau, rejista ema vitima kanek na’in-16, tanba hetan tuda ho fatuk hosi militante partidu rua nian.

“Iha insidente ne’ebé mak ita hotu akompaña, la espera, horseik mosu iha Munisípiu Baucau, ne’ebé mak rezulta ita-nia siadadun balu hetan sasán estragus, no na’in-16 mak vitima hosi perturbasaun ne’e,” Armando Monteiro informa.

PNTL Hein Keixa

Iha loron 06 Marsu ne’e, mosu mós aktu ida ne’ebé konsidera nudár krime eleitorál iha área Holarua, Munisípiu Manufahi.

Insidente ne’e mosu bainhira militante no apoiante sira balu hosi partidu CNRT ne’ebé halo komvoiu ba Manufahi, hodi partisipa iha kampãna kandidatura José Manuel Ramos Horta nian.

Infelizmente, iha dalan klaran, área Holarua, mosu impedimentu hosi individuu sira balun, ne’ebé deskonfia militante, apoiante no kuadru partidu FRETILIN Munisípiu nian.

“Adriano Corte-Real ne’e hanesan lider másimu ba partidu FRETILIN iha Manufahi, komu labarik sira halo fali pawai, kala perturba trankuilidade oitoan, prontu, entaun, katuas tun ba hakilar sira, mais hanesan baku ne’e laiha. Liu tiha mak polísia to’o ba buli kedas katuas Adriano Corte-Real, lori mai iha uma,” komandante PNTL Munisípiu Manufahi, Joni Maria Viana, informa ba Hatutan.com, iha via telefoníka.

Kona-ba identifikasaun, komandante PNTL Manufahi ne’e esplika, presija iha keixa ruma hosi ema sira ne’ebé sente sai vitima. Tanba ne’e, PNTL la halo identifikasaun ba autór ruma.

Daudaun ne’e mós parte estrutura tomak komandu jerál PNTL nian, hala’o hela reuniaun alargada ida, hodi diskute solusaun kona-bá insidente iha Holarua, liuhosi video ne’ebé viral iha média sosiál Facebook. 

Iha sorin seluk, Joni Viana informa, oras ne’e, situasaun jerál iha kampaña eleitóral hosi kandidatura José Manuel Ramos Horta nian iha Manufahi, la’o ho di’ak no hakmatek.

Komandu PNTL sempre servisu hamutuk ho CNE atu tau matan lala’ok tomak iha kampaña eleitóral ba eleisaun prezidensial ne’e, no husu ba ekipa susesu sira kada kandidatura sira PR nian, atu koopera di’ak nafatin ho parte seguransa, nune’e atividade hotu hala’o ho pasifíka.

Tuir relatóriu, hahú hosi loron 02 to’o 06 fulan-Marsu  ne’e, komandu PNTL rejista insidente hamutuk 21, asidente tráfegu iha 14,  ne’ebé mak akontese iha periúdu kampaña eleitóral ba eleisaun prezidensial nian.

Jornalista: Rogério Cárceres