Hatutan.com, (25 Fevereiru 2022), Díli—Embaixadór foun  Austrália nian iha Timor-Leste (TL), William Costello entrega karta kredensiál ba Prezidente Repúblika, Francisco Guterres ‘Lu-Olo’ no komprometidu hodi la’o hamutuk ho TL no sei sai nafatin parseiru ne’ebé firmi iha futuru.

Embaixadór Costello antes ne’e serve ona iha Washington, Port Moresby, Manila, no Phnom Penh, no mós iha Canberra.

Embaixadór Costello sei tau prioridade durante nia mandatu hodi garante parseria nafatin ho TL tuir objetivu rasik, hodi hadi’a moris ba povu Timoroan no hakle’an kapasidade iha Governu hodi fó rezultadu ne’ebé makaas liután ba sira.

“Ita-nia nasaun rua nu’udár viziñu, ita-nia relasaun hosi povu ba povu forte tebes, no kooperasaun entre ita-nia governu luan no kle’an tebes,” Costello hateten.

Prezidente Repúblika ho Embaixadór konkorda ona kona-bá importánsia ba iha Austrália nia apoiu, hodi kombate dezafíu sira hosi Covid-19, inklui liuhosi taxa vasinasaun aas, investimentu ne’ebé la’o hela iha bolsa-estudu, haburas oportunidade ba traballadór Timoroan sira iha Austrália no dezenvolve infraestrutura prinsipál, hanesan Cabo Telekomunikasaun Submarinu Súl, reforma Aeroportu Internasionál Prezidente Nicolau Lobato no infraestrutura atualizada iha Portu Hera, hodi apoia ba Ró Patrulla Klasse Guardiaun rua oferesidu hosi Austrália, previstu iha tinan 2023.

Jornalista: Vito Salvadór