Hatutan.com, (18 Fevereiru 2022), Díli- Asosiasaun HAK sujere ba Provedoria  Direitus Umanus no Jusira (PDHJ, sigla portugés) atu ajuda Ministériu Públiku (MP) aselera prosesu kazu projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) ne’ebé Komisaun Anti Korrupsaun (CAC) submete ona ba MP.

Notísia iha Relasaun: Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Diretór Azekutivu Asosiasaun HAK, Sisto dos Santos. Foto/Hatutan.com

CAC rasik finaliza ona nia serbisu investigasaun ba kazu projetu instalasaun Set-top Box/dexodificador RTTL,E.P ne’ebé deskonfia iha indísiu pratika abuzu podér, korrupsaun, kolizaun no nepotizmu  (KKN) iha Ministériu Asuntu Parlamentár no Komunikasaun Sosiál (SEKOMS).

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nudár Sekretaria iha Gabineten Prezidente FFTL.  

Diretór Asosiasaun HAK, Sisto dos Santos, hateten PDHJ tenke halo cross check nia prosedimentu sira iha projetu Set-Top Box/ dexodificador RTTL,E.P tuir duni natureza boa-governasaun ka lae. Se la tuir boa-governasaun, la bele husik ba MP konsidera kazu ne’e hanesan segredu justisa hodi la pronunsia nia prosesu ba iha públiku.

“La iha buat ida konfidensial kuandu nia prosesu inísiu la tuir dalan normal,”  Sisto dos Santos hateten ba Hatutan.com iha Edifísiu Asosiasaun HAK, Faról, Dili, Sesta (18/02/2022).

Notísia iha Relasaun: Akadémiku Husu MP Labele “Budu” Kazu Set-top Box RTTL,E.P

Sisto hateten, públiku tenke kestiona projetu Set-top Box RTTL,E.P ne’ebé deskonfia MAPKOMS halo adjudikasaun direita ba nia sekretaria rasik iha FFTL tamba prosesu hirak-ne’e mak perturba integridade sistema judisiáriu iha Timor-Leste.

“Ami rekomenda katak prosesu legál iha MP nia liman, maibé PDHJ iha knaar lejítimu atu tracking katak nia prosesu ne’e ho mekanizmu ida ne’ebé mak imparsiál no saudavel tamba mai husi prosesu ida loos tamba iha balun saudavel, maibé dala ruma la liu husi dalan legál,” Sisto  dos Santos hateten.

Diretur ezekutivu ne’e hatutan iha prinsípiu separasaun podér mandatu órgaun judikativu biar kazu ida iha ona finalidade, maibé públiku iha direitu atu reklama para bele halo diagnosa katak prosesu ne’ebé la’o ona ne’e justu ka lae.

Asosiasaun HAK konsidera seidauk tarde atu PDHJ dudu hodi kestiona prosesu ida ne’ebé mak la transparente no hamosu duvida barak tamba PDHJ nia knaar ida mak tenke divulga sai prosesu sira ne’e hodi hatán hela ba públiku nia duvida no HAK iha konfiansa katak PDHJ iha korajen atu buka tuir ida ne’e.

“PDHJ lori povu nia naran hodi kestiona no reklama mekanizmu sira ne’ebé nakonu ho duvida sira ne’e,” Sisto hateten.

Notísia iha Relasaun: Projetu Set-top Box RTTL,E.P, MAPKOMS Prontu Ba Hatán iha Tribunál

Jornalista: Vito Salvador