Hatutan.com, (16 Fevereiru 2022), Díli—Konsellu Ministru (KM) liu hosi sorumutu ordináriu iha Palásiu Governu, Kuarta (16/02/2022), aprova ho alterasaun ba projetu Rezolusaun Governu nian, ne’ebé aprezenta hosi Vise-Ministra Finansas, Sara Lobo Brites.

Reuniaun KM. Foto/Média MPKM.

Aprovasaun alterasaun ba Projetu Rezolusaun Governu nian ne’e hodi estabelese estrutura administrativa ne’ebé responsável ba realizasaun Resenseamentu Jerál Populasaun no Abitasaun Timor-Leste tinan 2022 (Sensu 2022).

Notisia iha Relasaun:KM Aprova Projetu Sira Dekretu Governu ba Alterasaun Lei Eleitorál Prezidente Repúblika

Iha Rezolusaun Governu ida-ne’e define sé mak entegra ba kada komisaun tolu ne’e ida hodi konstitui estrutura administrativa responsável ba realizasaun Sensu tinan 2022.  Komisaun tolu ne’e maka hanesan:

Komisaun nasionál sensu 2022 ne’ebé hanesan iha misaun orientasaun polítika no administrativa hosi atividade sensitária, nune’e mós mobilizasaun rekursu umanu no materiál nesesáriu sira; sei halo avaliasaun téknika ba atividade sensitária, revizaun instrumentu sensitária sira no rekomendasaun hosi prátika di’ak sira ba rekolla no tratamentu dadu nian; no Komisaun publisitasaun sensu 2022 nian ne’ebé sei responsabiliza hodi informa no prepara públiku jerál ba atividade sensitária.

“Resenseamentu Jerál Populasaun no Abitasaun ne’e iha objetivu prinsipál sira ba kontajen no karakterizasaun populasaun ne’ebé rezidente iha Timor-Leste,” Hatutan.com sita komunikadu.

Nune’e mós levantamentu ba alojamentu ne’ebé eziste no ninia kondisaun sira abitalidade nian, mediante hodi rekolla ezaustiva elementu no dadus sira, ne’ebé realiza hosi meiu operasaun sira inkéritu no tratamentu estatístiku nian.

Konsellu Ministru halo mós aprovasaun ba projetu proposta Lei alterasaun dahuluk ba Lei nú. 24/2021, loron 19 fulan-Novembru, ne’ebé prosede alterasaun dahuluk ba Lei númeru 10/2004, loron 24 fulan-Novembru, Lei hosi Sistema Nasionál Saúde nian no aprova medida esesionál no temporáriu Vijilánsia sira ba resposta pandemia moras COVID-19 nian, ne’ebé aprezenta hosi Ministra Saúde, Odete Maria Freitas Belo. 

Projetu Proposta Lei ida-ne’e ninia objetivu maka atu aumenta prazu vijénsia hosi medida sira ne’ebé prevee iha artigu da-3 hosi Lei n.° 24/2021, loron 19 fulan-Novembru.

Iha sorin seluk, Konsellu Ministru aprova ona projetu Rezolusaun Governu nian, ne’ebé aprezenta hosi Vise-Ministru Negósiu Estranjeiru no Kooperasaun, Julião da Silva, ne’ebé aprova adezaun Akordu-Kuadru kona-bá fasilitasaun komérsiu transfronterisu la ho surat-tahan iha Ázia no Pasífiku nian.

Hein katak Akordu-Kuadru ida-ne’e fornese ba país Ázia no Pasífiku sira ferramenta no komplementu dijitál foun ida ba implementasaun Akordu Fasilitasaun Komérsiu Organizasaun Mundiál Komérsiu di’ak ida no ba dezenvolvimentu komérsiu eletróniku transfronterisu nian, hosi dalan konjuntu komún prinsípiu jerál no plataforma itergovernamentál ne’ebé dedikadu.

Halo aprovasaun mós ba projetu Dekretu-Lei, ne’ebé aprezenta hosi Ministru Administrasaun Estatál, Miguel Pereira de Carvalho, ba alterasaun datoluk ba Dekretu-Lei nu. 8/2013, loron 26 fulan-juñu, kona-ba Rejime Jerál Programa Dezenvolvimentu Suku sira (PNDS) nian.   

Konsellu Ministru delibera ona hodi autoriza negosiasaun Akordu sira “Millennium Challenge Compact” no “Program Implementation Agreement”, entre Estadus Unidus Amérika, liuhosi Millennium Challenge Corporation no Repúblika Demokrátika Timor-Leste.  

Konsellu Ministrus deside ona mós hodi atribui ba Ministru Prezidénsia Konsellu Ministrus, Fidelis Manuel Leite Magalhães, podér tomak ba negosiasaun no asinatura akordu ida-ne’e.

Ikusliu, Ministru Administrasaun Estatál, aprezenta ona ba Konsellu Ministrus opsaun polítiku-lejizlativa subjasente sira ba inisiativa alterasaun ba Dekretu-Lei nu.12/2018, loron 25 fulan-abríl, kona-ba subsídiu estraordináriu ba membru Órgaun sira Administrasaun Eleitorál nian. 

Jornalista: Vito Salvadór